HOH ta introduci metodo mas moderno pa detecta cancer di prostaat

ORANJESTAD – Horacio Oduber Hospital (HOH) a introduci un metodo nobo y mas avansa pa detecta cancer di prostaat, usando un MRI prome prome pa identifica e area sospechoso prome cu haci un biopsia. E innovacion aki ta permiti un diagnosis mas preciso, cu menos dolor, menos complicacionnan y menos biopsianan innecesario pa pashentnan.

E sistema nobo ta combina imagennan di MRI y echo mediante tecnologia di fusion, permitiendo mediconan localisa anomalianan cu mas exactitud. Segun HOH, esaki ta aumenta e confiabilidad di resultado y ta mehora calidad di cuido.

E proyecto a wordo realisa gracias na colaboracion entre urologonan, radiologonan, personal tecnico y departamento di IT, hunto cu companianan externo. Ademas, HOH a modernisa su ekipo di MRI y echo y a integra inteligencia artificial (AI) pa optimisa e proceso diagnostico.

Segun directiva di HOH, e desaroyo aki representa un paso importante den cuido oncologico na Aruba y confirma e compromiso di hospital cu cuido moderno y enfoca riba e pashent.