Quota Aruba y FEPOH ta dona sistema moderno di audio na 10 scol

ORANJESTAD – Quota International of Aruba hunto cu Fundacion FEPOH a entrega oficialmente dies sistema di Redcat LightSpeed Classroom Audio na diferente scol na Aruba durante un ceremonia special den Sala Diamante na Biblioteca Nacional Aruba.

E donacion a wordo financia cu e entrada genera durante e actividad anual di fundraising cu Quota International of Aruba ta organisa durante carnaval, caminda nan ta bende earplugs.

E sistema di Redcat LightSpeed Classroom Audio ta un tecnologia moderno cu ta yuda maestronan amplifica nan bos den klas, pa mehora concentracion, comprension y participacion di alumnonan durante les.

Durante e encuentro, representantenan di e scolnan a ricibi tambe informacion y explicacion tocante e funcionamiento y importancia di e sistema den enseñansa moderno. Directornan y personal escolar a ricibi e equipo hunto cu documentacion necesario.

Experiencia di St. Paulus School, caminda e sistema ta den uso pa tres aña caba, a mustra resultado hopi positivo. Segun e scol, participacion di alumnonan y rendimiento escolar a mehora notablemente gracias na e tecnologia aki.

E scolnan cu a ricibi e sistema ta:

• Rosario College

• St. Rosa College

• St. Dominicus College

• Mon Plaisir Basisschool

• Prinses Amalia Basisschool

• St. Franciscus College

• Colegio Bon Bini

• St. Aloysius School

• Colegio Felipe B. Tromp

• St. Anna School

Cu e iniciativa aki, Quota International of Aruba y Fundacion FEPOH ta reafirma nan compromiso pa sigui apoyando calidad di enseñansa y creando un ambiente di aprendizaje mas inclusivo y efectivo pa mucha na Aruba.