Polis a detene 13 chauffeur pa maneha bao influencia di alcohol

SANTA CRUZ – Durante un control di trafico den madruga diadomingo 24 di mei 2026, polis di Santa Cruz a detene 13 chauffeur pa maneha bao influencia di alcohol.

E control policial a wordo realiza na diferente punto strategico den distrito di Santa Cruz, caminda polis a controla varios vehiculo durante e operacion.

Ademas di e detentionnan, polis a duna 14 multa relaciona cu diferente infraccionnan, incluyendo falta di rijbewijs valido, falta di keuringskaart valido y impuesto di vehiculo no paga.

Cuerpo Policial Aruba a indica cu controlnan den trafico lo continua regularmente como parti di e esfuerzo pa aumenta seguridad riba caminda publico.

Polis ta haci un apelacion na tur automobilista pa mantene documentonan di vehiculo na ordo y sigui regla di trafico. Tambe a recorda conductoranan pa baha velocidad, usa safety-belt y evita uso di celular durante conduccion.

“Si bo ta bebe, no stuur,” polis a enfatisa, mientras cu tambe a recomanda pa semper tin un chauffeur responsabel disponible.

Segun polis, un trafico sigur ta responsabilidad di tur ciudadano.