Polis ta detene varios sospechoso rapidamente despues di tiramento na Seroe Colorado

SAN NICOLAS – Un accion rapido di Cuerpo Policial Aruba a resulta den detencion di varios sospechoso despues di un incidente di tiramento cu a sosode diamars merdia na Seroe Colorado.

Pa mas o menos 12:06 di merdia, central di polis a ricibi informacion di un hende homber cu a reporta cu un auto KIA color blauw cu cuatro homber aden lo a sigui su vehiculo y despues los varios tiro den su direccion. Segun e victima, su auto a wordo alcanza durante e incidente.

Inmediatamente, central di polis a despacha diferente patruya di San Nicolas y otro unidadnan pa e area. Na yegada riba caminda cu ta bay den direccion di hotel Secrets Baby Beach Aruba, polis a topa cu e chauffeur di e auto afecta, kende a duna descripcion di e vehiculo sospechoso y di e ocupantenan.

Basa riba e informacion ricibi, polis a inicia un busqueda intensivo. Poco tempo despues, autoridadnan a logra localisa e auto KIA blauw cu posiblemente tabata envolvi den e caso na altura di Isaac Wagemakerstraat. E vehiculo a wordo confiscá pa investigacion adicional.

Durante e operacion, polis tambe a logra detene dos sospechoso na Dirkszstraat. Mas despues, un tercer sospechoso a wordo detene na Isaac Wagemakerstraat. Tur sospechoso a wordo transporta pa warda di polis San Nicolas pa nan presenta dilanti subfiscal.

Recherche y polis technico a presenta na diferente sitio pa sigui cu investigacion den e caso.

Polis a felicita tur unidadnan cu a participa den e operacion, enfatizando cu e reaccion rapido a contribui pa pone man riba e sospechosonan den corto tempo.

Cuerpo Policial Aruba ta haci un yamada na comunidad cu si algun persona a mira of sa algo tocante e incidente, nan por contacta tipline di polis na 11141. Tur informacion lo keda completamente anonimo.