Colombianonan na Aruba por vota e siman aki den eleccion presidencial 2026

ORANJESTAD – Consulado di Colombia na Aruba a anuncia oficialmente cu ciudadanonan colombiano cu ta biba na Aruba lo por participa den e Eleccionnan Presidencial di Colombia 2026 durante e siman di 25 te cu 31 di mei 2026. E proceso di votacion lo tuma luga na Cas di Cultura na Oranjestad. Segun e anuncio oficial, e horario pa vota ta di 8:00 di mainta te cu 4:00 di atardi tur dia durante e periodo menciona. Consulado di Colombia a enfatisa cu “bo voto ta conta, bo pais mester dibo”, motivando colombiano nan residente na Aruba pa eherce nan derecho democratico.

Ademas di votacion, e Consulado a informa cu durante e siman aki, tramitenan consular tambe lo wordo atendi na Cas di Cultura, situa na Vondellaan 2 na Oranjestad. E horario pa tramitenan consular ta di dialuna te diabierna, entre 8:00 di mainta y 1:00 di atardi. Sinembargo, Consulado a aclara cu expedicion di cedulanan y paspoortnan no lo ta disponible durante e periodo aki.

E anuncio ta forma parti di e preparacionnan internacional pa eleccion presidencial colombiano di 2026, unda colombianonan cu ta biba pafor di Colombia tambe ta haya oportunidad pa emiti nan voto den diferente paisnan rond mundo.