MEP ta pidi reunion publico urgente tocante alegacionnan durante bishita di Rey

ORANJESTAD – Fraccion di Movimiento Electoral di Pueblo den Parlamento a entrega un peticion urgente na presidente di Staten di Aruba pa convoca un reunion publico cu Prome Minister Eman tocante alegacionnan di supuesta irregularidadnan y asunto di integridad relaciona cu bishita oficial di Rey na Aruba na maart 2026.

CARTA RIBA DENUNCIA 

Den e carta oficial, firma pa parlamentario Evelyn Wever-Croes, Edgard Vrolijk y Shailiny Tromp-Lee, MEP ta bisa cu recientemente a wordo ricibi un denuncia anonimo den cual ta alegando cu un asesor di Prome Minister lo por a haci abuso di su funcion y posicion pa beneficio personal durante actividadnan conecta na e bishita oficial di Su Mahestad Rey.

MEDIDA APROPIA

Segun e documento, tambe tin alegacion cu Prome Minister lo tabata na altura di e situacion, sin cu a wordo tuma medida apropiá. MEP ta considera cu e acusacionnan aki ta toca directamente principionan fundamental di bon gobernacion, transparencia y integridad dentro di administracion publico. “Mirando gravedad di e alegacionnan y creciente preocupacion den comunidad, ta necesario cu gobierno duna aclaracion publico y rindi cuenta na Parlamento y pueblo di Aruba,” e carta ta indica. E fraccion politico a expresa tambe cu confianza di pueblo den institucionnan democratico no por sigui wordo pone bou di presion door di falta di claridad of ausencia di responsabilidad publico. Pa esey, nan ta pidi cu e reunion publico wordo agenda cu urgencia. E peticion oficialmente a wordo entrega dia 12 di mei 2026 na presidente di Staten di Aruba, cu e meta pa discuti e asunto den un reunion publico cu mas rapidez posible.