Eman: Gobierno ta revisando pa habri frontera aereo cu Venezuela dia 1 di augustus

ORANJESTAD – Prome Minister Mike Eman diahuebs mainta a sorprende tur hende y admiti y confirma cu Gobierno di Aruba ta sigui cu e preparacionnan pa habri e conexion aereo entre Aruba y Venezuela, cu e fecha proponi di 1 di augustus, y ta evaluando si esaki ainda ta riba mesa. Sinembargo, segun e prome minister, e situacion actual na Venezuela despues di e fuerte temblornan y e daño na aeropuerto internacional di Maiquetía lo determina si e plan por sigui dilanti. Durante un declaracion oficial, Eman a bisa cu Gobierno lo mantene contacto cu autoridadnan venezolano pa evalua e situacion.

HABRI CONEXION ATROBE

“Precisamente, nos ta den proceso pa logra habri e conexion aereo cu fecha proponi pa dia 1 di augustus, cuminsando cu un buelo pa dia. Naturalmente, nos lo comunica cu Venezuela pa wak si e plan ainda ta posible, mirando e situacion actual di aeropuerto di Maiquetía.” Segun Eman, Gobierno no kier tuma ningun decision prematuro, ya cu e prioridad actualmente ta e emergencia humanitario na Venezuela. “E decision ta depende di e circunstancianan actual y nos lo evalua si e fecha proponi ainda ta realisabel cu tur loke ta desaroyando.”

CORREDOR HUMANITARIO HABRI INMEDIATAMENTE

Aunke apertura regular di buelonan ainda ta bou evaluacion, Prome Minister a anuncia cu Aruba a dicidi habri un corredor humanitario pa facilita asistencia urgente na Venezuela. “For di ayera mainta, nos a dicidi pa habri un corredor humanitario. Cualkier avion cu sali for di Aruba bai Venezuela cu cualkier tipo di asistencia ta liber pa haci esey.” Eman a splica cu pa corredor humanitario por opera regularmente, mester coordina diferente aspecto tecnico entre e autoridadnan di aviacion di Aruba y Venezuela.

FIRMA MOU PA REAPERTURA DI FRONTERA

“Nos kier coordina entre Departamento di Aviacion di Aruba y Departamento di Aviacion di Venezuela. Mester firma un Memorandum di Entendemento (MoU) pa coordina tur e aspectonan ey.” Eman a sigui bisa. E la agrega cu un grupo di trabou lo sigui cu e preparacionnan, pero cu Aruba ta dispuesto pa facilita ayudo mesora cu esey ta posible. “Si por adelanta y yuda di cualkier forma, sea cu contacto familiar of otro tipo di apoyo, Gobierno ta habri pa esey.”

ESPACIO AEREO DI ARUBA DISPONIBEL

Prome Minister tambe a revela cu Aruba a comunica cu e ekiponan hulandes di emergencia y rescate, ofreciendo espacio aereo di Aruba pa misionnan humanitario. “Nos a comunica tambe cu e ekiponan hulandes di emergencia y rescate. Si nan kier usa espacio aereo di Aruba pa cualkier tipo di asistencia, nan por haci esey.”

SOLIDARIDAD CU PUEBLO VENEZOLANO

Na final di su declaracion, Eman a expresa solidaridad cu e victimanan di e desastre natural y cu tur famianan afecta. “ Nos ta expresa nos solidaridad cu pueblo di Venezuela. Aruba ta cla pa yuda unda cu por.” Cu e anuncio aki, Gobierno di Aruba ta confirma cu, apesar cu e reapertura regular di frontera aereo ta depende di con e situacion na Venezuela ta evoluciona den e dianan cu ta bini, e isla ta move rapidamente pa habri camindanan pa asistencia humanitario y pa brinda apoyo na e pais bisiña durante e emergencia actual.