Pa fin di luna Sevinger, Arends y Sussebeek mester presenta na KIA pa sinta nan castigo

ORANJESTAD –  Cu e sentencia definitivo di Hoge Raad den e caso Avestruz awor conoci, atencion ta move pa e siguiente fase: ehecucion di e castigo di prizon contra e ex minister Benny Sevinger y coacusadonan Leoncita Arends y Pieter Sussebeek.

PIDI GRATIE

Segun informacion confirma door Ministerio Publico (OM) na Noticiacla, despues di e decision di Hoge Raad di ayera, ta sigui un periodo obligatorio di 9 dia, den cual ehecucion di e castigo ta wordo temporalmente para. E periodo aki ta duna oportunidad pa e condenadonan pa, si nan kier, solicita gratie.

ENKELBAND

Noticiacla a puntra Ministerio Publico si e posibilidad di uso di enkelband ta un opcion den e caso aki, manera cu hopi tabata specula. Aki a bin e punto importante cu a wordo aclara ta cu , segun Ministerio Publico, Aruba no tin ningun regla legal pa aplicacion di supervision electronico, esta pa bisa uso di enkelband. Esaki ta elimina, pa e momento, cualkier posibilidad formal pa ehecuta e castigo na cas bou di control electronico.

EHECUCION DI E SENTENCIA

Unabez e 9 dianan pasa y no tin ningun peticion di gratie presenta, OM ta haya luz berdad pa sigui cu ehecucion di e castigo. Den practica, esaki ta nifica cu autoridadnan ta fiha un fecha concreto y invita e condenadonan pa presenta nan mes voluntariamente na Korrektie Instituut Aruba (KIA) pa cuminsa cu nan detencion. Mirando e fechanan cu tin, ta premira cu esaki lo bira e ora den careda di fin di luna aki, aunke un fecha exacto ainda no ta poni. 

PRUEBA IMPORTANTE 

E proseso aki ta pone e caso Avestruz den su fase mas critico: no solamente un decision di corte, pero e momento unda castigo mester bira realidad. Cu esaki, Aruba ta enfrenta un prueba importante pa su sistema di husticia, unda ehecucion correcto di e sentencia lo determina nivel di confianza di pueblo den e sistema.