Corte di Casacion: Sentencia contra ex-minister Sevinger ta keda valido!

AMSTERDAM – Manera por a spera, Corte di Casacion a mantene e sentencia contra ex minister Benny Sevinger den caso Avestruz valido, conforme e conseho di Abogado General, cu ta nifica cu Sevinger definitivamente ta perde den e caso Avestruz.. Esaki pasobra Corte di Casacion tabata e ultimo chens pa Sevinger pa trece cambio of no. Si Corte di Casacion mantene e sentencia di corte di apelacion, ta nifica cu esaki ta e parti final di e caso, y cu Sevinger definitivamente tin cu sinta su castigo. 

E PENSAMENTO DI CASACION

E condena di un ex-minister di Desaroyo Espacial, Infrastructura y Medio Ambiente (y despues di Desaroyo Espacial, Integracion y Infrastructura) na Aruba pa co-participacion den fraude contra e Pais Aruba, pa omkoping pasivo (laga su mes wordo cumpra) y verduistering, ta keda firme. Esaki a wordo confirma awe door di Hoge Raad. Mesun cos ta conta pa e condenanan di dos sospechoso co-implica, entre otro pa omkoping e minister.

E CASO CONTRA E MINISTER

Gemeenschappelijk Hof a determina cu e forma di traha tabata asina: na nomber di companianan controla pa un di e co-sospechosonan (un persona liga na su partido politico), a wordo entrega peticionnan na minister pa haya (opcion riba) derecho di erfpacht. E companianan tabata “bashí” na momento di entrega y casi sin balor.

E meta tabata pa, unavez cu e opcionnan a wordo concedi, bende e accionnan cu ganashi halto. E rol di e minister tabata cu el a aproba e peticionnan casi mesora, apesar cu tin atraso den peticionnan di otro personanan. Asina el a pone e peticionnan di su co-sospechoso prome y a evita cu nan wordo controla segun politica vigente.

Ademas, e minister a acepta regalo di e co-sospechoso durante un periodo cu el mester a tuma decision riba nan peticionnan pa erfpacht, loke ta constitui omkoping pasivo. Tambe el a usa placa di un fundacion cu e tabata maneha — destina pa su campaña electoral — pa paga un biahe priva di su esposa. Segun  Hof, esaki ta verduistering.

CASTIGO

Hof a condena e ex-minister pa 48 luna di prizon, di cual 12 luna condicional. Tambe el a wordo prohibi pa ocupa cargo publico y pa wordo eligi den organonan representativo pa un periodo di seis aña.

Dos co-sospechoso a ricibi condena di 30 luna (10 condicional) y 24 luna (12 condicional). Tur tres a apela e decision den casacion.

RECLAMO DEN CASACION

Abogadonan di e ex-minister a pidi pa cancela e condena. Nan a argumenta, entre otro, cu como representante di e Pais Aruba, e minister no por a comete fraude contra e pais mes. Tambe nan a discuti cu no tin suficiente prueba cu el a usa placa di e fundacion pa otro proposito.

CONSEHO DI ABOGADO GENERAL

E Advocaat-Generaal a conseha riba 3 di februari 2026 pa declara tur reclamo sin base. Mes conclusion a wordo duna pa e caso di e co-sospechoso.

DECISION FINAL

Segun Hoge Raad, tur reclamo den casacion a wordo rechasa. Corte a indica cu e reclamonan no ta crea ningun pregunta legal nobo ni motibo pa cambia e sentencia.

Cu e decision aki, tur condena y castigo a bira definitivo. Wak e sentencia AKI.