Corte ta confirma control di Massari riba proyecto Serena Residence na Seroe Colorado

ORANJESTAD – Corte a duna un inversionista razon den un conflicto largo tocante un proyecto di miyonan di real estate na Aruba. Corte ta confirma cu e inversionista a haya control legal riba e proyecto y cu e otro partidonan por wordo haci responsable pa daño. E caso ta gira rond di e  proyecto Serena Residence na Seroe Colorado. Na 2021, tabata tin riesgo cu e proyecto lo wordo bendi den un subasta hudicial pa motibo di un debe pendiente. E benta a wordo preveni despues cu partidonan a firma un acuerdo di cooperacion, unda inversionista Massari a tuma riba dje e financiamiento.

Segun corte, Massari a cumpli cu su acuerdonan door di paga e debe y preveni e subasta. E otro partidonan, entre otro Greenland y Yosemite, no a cumpli cu nan obligacionnan y pa esei nan a perde e caso.

Corte ta confirma cu desde 2022, Massari a bira accionista mayoritario y tin control riba e proyecto. E otro parti mester pone e accionnan restante bou di manejo di un notario y no mag di interferi mas cu e venta of representacion di e proyecto.

Ademas, corte a determina cu directornan involucra a actua contra ley. Nan a tuma decisionnan sin un reunion valido di accionistanan y a sigui presenta nan mes de forma incorrecto como director. Pa cualkier daño cu a resulta di esey, nan por wordo haci personalmente responsable.

Tambe un intento di e accionistanan original pa cumpra e accionnan bek, a wordo rechasa pa e corte como inaceptabel.

Cu e decision aki, ta bin un fin provisional na un conflicto huridico compleho rond di e proyecto, den cual tabata tin varios procedimiento y reclamonan entre e partidonan.