Gobierno hulandes a fada: Bosal obligatorio y curso pa cacho

VEENENDAAL – E cacho Bente no a haya ningun salbacion. E cacho di Veenendaal a bira victima siman pasa di un pitbull y no a sobrevivi e atake. Gobierno a cansa cu cacho ta causa daño na hende y otro animalnan, y awor ta bin cu un serie di medida fuerte. Asina, tur dueño di cacho lo mester sigui un curso. Recientemente a habri un punto di reporta nacional pa mordi di cacho, unda comportamiento peligroso y incidente di mordi por wordo reporta. Pero tin mas medida na caminda, manera un curso obligatorio pa tur hende cu kier tuma un cacho.

CLARIDAD

E punto di reporta nacional tin como meta pa haya mas claridad riba cuanto biaha incidente di mordedura ta pasa, den cual situacion nan ta sosode y di cua  tipo di cacho ta trata. E idea ta cu e politica despues por wordo ahusta segun e informacion aki. E punto di raporta ta destina pa huisarts, ciruhanonan plastico, veterinario, trabadornan di cuido y ciudadano.

CURSO PA DOÑO DI CACHO

Pero tambe ta trahando riba un curso cu tur hende cu kier un cacho mester completa prome cu nan cumpra un. Probablemente lo ta un curso teorico cu por wordo sigui online, y cu ta siña riba comportamiento di cierto rasa. E curso tambe mester laga cla cual responsabilidad un doño tin, por ehempel pa preveni mordi peligroso (hasta mortal). Posiblemente lo bin tambe un entrenamiento practico obligatorio. E idea ta cu, door di haci e curso obligatorio, hende lo pensa miho prome cu nan kumpra un cacho, enbes di haci un desicion impulsivo.

CACHO CU BOSAL

Un otro medida cu ta wordo considera ta un obligacion nacional pa tene cacho cu comportamiento peligroso mara y cu bosal. Awor ainda ta asina cu solamente municipio por pone e tipo di obligacion ey. Si un hende ta cana cu su cacho den un otro municipio, e regla ey no ta aplica. Pero gobierno central ta di opinion cu no mester depende di ubicacion si un cacho mester ta mara of cu bosal. Cacho cu a causa daño serio ya por wordo mata riba orden di fiscal. Pero actualmente, dueño por presenta obhecion, cu por causa cu cacho peligroso ta keda den opvang pa meses, sperando un decision nobo.

Den mayoria di caso, decision pa eutanasia ta keda na pia, aunke tin obhjecion. Pa e motibo ey, ministerio di Agricultura, Naturalesa y Calidad di Cuminda kier mira si e proceso no por bai mas lihe. Tambe ta mira si ta posible pa obliga doño di cacho pa sigui un curso despues di un incidente di mordi. Ademas, lo bin mas regla pa tene y cria cacho cu, por ehempel, mandibula fuerte y caracter vigilante. Kico ora tur e plannan aki lo bira realidad, ainda no ta cla.