MIAMI – Despues di mas di 50 aña cu e ultimo nave espacial, Apollo 17 a aterisa riba luna, un nave espacial ta haci e intento atrobe, pero den 2024. E asina yama nave Peregrine, uno comercial, ta planea pa wordo lansa dia 8 di januari 2024, y despues di varios biahe den orbita, cu varios mision pareu, lo haci un intento atrobe pa aterisa riba luna, dia 23 di februari 2024.
Peregrine ta e prome nave di e compania comercial Astrobotic cu lo haci e intento aki. E ta carga un total di 20 carga, incluyendo 5 di NASA, cu lo inclui e santo di beach di Aruba. Asina e specialista di NASA, Edward Cheung a confirma tambe diaranson. “E nave ta contene varios carga cu ta representa humanidad via arte y artefacto historico” e comunicado oficial ta bisa. Y ta aki ta unda segun Cheung, esaki ta inclui. “Esaki ta e mission cu lo carga un muestra chikito di e beach di Aruba pa luna, via e programa di DHL moonbox” Cheung a sigui bisa.
ATERISAHE DIFICIL
Segun e CEO di e compania Astrobotic, aterisa riba e superficie di luna, ta increiblemente dificil”. Pero a haci suficiente prueba y nan ta sigur di por haci esaki. “ Nos ta cla pa e lansamento y e aterisahe” John Thorton a bisa.
PAKICO E TARDANSASi mira e fechanan, ta nota cu tin un ‘tardansa’ pa yega luna e biaha aki. Esaki ta pasobra e nave tin un lista largo di cos pa check durante e biahe.
MINESOTA – Un grupo di biahero cu a paga bon placa pa nan vacacion na Aruba, a keda defrauda pa un agente di biahe di Minesota cu a haci esaki mas biaha. Ta trata di e agente di biahe Monica Faulker. E agente aki a laga un grupo di 71 biahero desampara na Costa Rica, sin hotel. Un otro grupo a keda pega ora cu nan a yega riba waf pa subi un barco crucero, solamente pa tende cu e agente no a paga e barco nan placa.
LONDEN – Cabaynan Real di Inglatera a scapa durante un entrenamiento y a core pa loco den centro di Londen diaranson mainta. Mientrastanto tur e 5 cabaynan a wordo gara bek. Por lo menos 4 persona a keda herida, y e cabaynan tambe. E cabaynan ta pertenece na un stal di e cas Real Britanico. E problema ta cu nan tabata den entrenamiento ora cu nan tur a scapa y drenta e ciudad. E cabaynan, den panico a core dal den taxi, bus y mas, lagando nan destrui. No ta conoci kico a sosode cu e cabaynan a logra scapa.
DEN HAAG - Agencianan di inteligencia Hulandes, e inteligencia militar y seguridad (MIVD), y e servicio general di inteligencia y seguridad (AIVD) a uni forza pa investiga e panorama politico y militar Venezolano. Nan enfoke ta extende pa implicacionan pa Reino Hulandes cu atencion particular na e paisnan Aruba, Corsou y Bonaire. Entre e investigacionan aki, tin e regimen di Maduro pa solidifica su poder y stragecia pa e proximo eleccion na juli di e aña aki. Tambe tin e situacion fronteriso cu pais bisiña Guyana esta Essequibo. Internamente ta bisa cu e regimen militar ta marginalisa, y cu e oposicion ta bringando otro tambe. Ta mustra segun e investigacion inicial cu e regimen no ta mucho habri pa consesion pa eleccion honesto.
SALERNO – Dos pitbull a morde y mata n baby di 15 luna na Italia recientemente. E incidente a sosode den Salerno, un pueblo den sur di Italia. E mucha di e baby a keda herida durante e atake. E baby tabata den brasa di e tio, ora cu e cachonan a ranca e baby for di e brasa. E mama a purba rescata e baby, y a keda herida den e intento ey. E pitbulnan tabata di un famia cu ta biba den e mesun bario. Den un otro relato separa, dos luna pasa, un hoben di 15 aña, tambe na Italia, a wordo mata door di tres rottweilers. E cachonan a scapa di un cura den Manziana na Roma. E curpa a wordo haya door di un peaton den un parke. Den ambos caso, no tin informacion di kico precies a conduci na e atake di e cachonan aki.
TEHERAN – Mientras cu tin informacion cu Israël a ataca Iran durante diabierna marduga, tur dos pais ta keto riba e atake aki. Iran ta bisa cu e la saca algun drone di Israël for di shelo, pero ta desmenti cu tabatin un atake di raket. Algo cu prensa Mericano si ta raporta. Iran no ta yama Israël como e culpable tampoco, dus tin hopi incertidumbre riba e atake aki. Recientemente Iran a haci un atake specifico y calcula riba Israël, y despues Israël a keda keto. Esaki ta un noticia den proceso.
ORANJESTAD/SANTO DOMINGO – Un cantidad grandi di Dominicano bibando ‘ilegamente’ na Aruba, a bolbe nan pais boluntariamente. Asina e portal El Nacional a raporta diamars. Na tur, ta trata di mas di 4.300 dominicano cu tabata residencia e.o. na Aruba, cu a bolbe nan pais bek den e ultimo 15 lunanan. E portal ta cita datonan ‘estadistica’ obteni di e aeropuerto di Las Americas. Fuera di Aruba, nan tabata ubica na e.o. Panamaá, Venezuela, Colombia, Mexico, Argentina, Chile, Honduras, Corsou, Spaña, Francia, Italia y Alemania. “Mas di 60% di e Dominicanonan aki ta muhernan”, e portal ta sigui bisa. E Dominicanonan cu a bolbe tabata haci trabou domestico, restaurant, beautysalon, y den centronan nocturno. “Nan tabata biba ilegalmente, soportando e persecucion di autoridad”. E hombernan tabata traha den agricultura, construccion, panaderia y otro tipo di negoshi”. Hopi di nan tabata biba entre 5 pa 6 aña bibando illegal, y a dicidi di bolbe boluntariamente. Pa nan por a bolbe, mester a haya sosten economico di nan famia na Republica Dominicano, y incluso e consuladonan cu ta representa e crioyonan na e paisnan aki” e portal ta sigui bisa. Un dato interesante ta bisa cu mas di 200 Dominicano a bolbe e aki caba (2024) y mayoria tabata di Panama, Venezuela y Corsou. NOTA: Noticiacla independientemente no por a verifica e informacion aki adkeri di e portal en cuestion.