MEP ta bai corte pa claridad riba ‘jet priva’ di Croes

ORANJESTAD — Parlamentarionan Evelyn Wever-Croes y Rocco Tjon, na nomber di fraccion MEP, a presenta un apelacion LAR na Corte di Prome Instancia contra e decision di minister Gerlien Croes pa no contesta preguntanan tocante su biahe oficial pa Corsou cu un jet priva dia 19 di november 2025.

Segun MEP, Croes a mantene su decision apesar di un conseho di Bezwaaradviescommissie LAR pa contesta, sin motiva su desviacion suficientemente. E fraccion ta pidi prueba di e parti di e gasto di aterriza cu e minister ta bisa cu el a paga. Segun e comunicado, Croes ta considera e prueba di pago informacion personal.

MEP ta cuestiona tambe ken a paga e resto di e gastonan y si esaki tabata un regalo cu mester a wordo declara y aproba segun e Codigo di Conducta pa Ministernan. E fraccion ta sostene cu e reglanan aki no a wordo cumpli.

Wever-Croes y Tjon ta pidi corte anula e decision di 28 di augustus 2026 y obliga e minister informa cuanto el a paga, na ken y ki dia. E alegacionnan di MEP ainda mester wordo evalua pa corte.