Aruba Birdlife Conservation ta bai Corte pa Isla di Oro y restriccion di off-road e siman aki

ORANJESTAD — Aruba Birdlife Conservation (ABC) lo aparece den Corte den dos caso pa defende naturaleza di Aruba. Un caso ta relaciona cu proteccion di e area humedo di Isla di Oro. E otro ta un demanda contra Gobierno di Aruba pa busca limitacion riba actividadnan motoriza fuera di caminda den varios area natural.

Segun e informacion comparti door di ABC, e dos procedimentonan ta trata asuntonan separa: conservacion di Isla di Oro y restriccion di uso di vehiculonan den area natural vulnerabel. E fechanan y oranan exacto di ambos caso no ta publica, pero ta confirma cu nan lo ta e siman aki.

E caso di off-road ta forma parti di e conflicto tocante actividadnan di UTV y ATV, cu Noticiacla a cubri anteriormente. ABC a argumenta cu e trafico motoriza ta causa erosion, stof, daño na vegetacion y perturbacion di fauna, y cu ta falta suficiente control pa proteha e areanan.

Manera Noticiacla a reporta anteriormente, Corte a duna Gobierno espacio pa busca un solucion, y Gobierno y ABC a cuminsa reunionnan formal. Gobierno a indica cu e ta busca combina proteccion di naturaleza cu actividadnan turistico y recreativo responsabel.

Cu e dos procedimentonan, ABC ta sigui busca proteccion di naturaleza via Corte. E informacion comparti no ta specifica e medidanan concreto cu lo wordo pidi den e caso di Isla di Oro.