Ehecutivo di turismo: Gobierno mester asumi responsabilidad prome cu carga comercio mas

ORANJESTAD — Un ehecutivo den sector turistico di Aruba a reacciona furete riba e informe Tourism 3.0, publica recientemente pa Noticiacla. Su mensahe principal ta cu Gobierno mester asumi su propio responsabilidad prome cu pone mas carga riba comercio.  E identidad di e ehecutivo ta conoci pa e portal aki, pero pa motibonan personal, e ta prefera pa su identidad keda ‘desconoci’.  

“No ta un solo impuesto; ta tur e impuestonan hunto,” e ehecutivo a señala. Cu esaki, e ta referi na e efecto acumula di impuestonan, aumento di salario minimo y otro gastonan cu empresanan ta enfrenta, mientras, segun su evaluacion, Gobierno ta amplia su personal sin resolve falta di productividad y burocracia.

E ehecutivo ta menciona tardanza na aduana, permitnan di construccion cu por tarda mas cu un aña y falta di contesta di DIP riba peticionnan di tereno. Segun e, e obstaculonan aki ta complica inversion y acceso na tereno. E ta argumenta cu, sin suficiente tereno di erfpacht disponibel, esnan cu tin mas placa ta termina cu e mihor oportunidad pa cumpra tereno.

MAS CONTROL RIBA HUURMENTO PA VAKANTIE

Un di su criticanan principal ta falta di cumplimento y fiscalisacion, particularmente den huurmento di cas pa vakantie. E ta reclama control riba obligacionnan fiscal y condicionnan di erfpacht, specialmente ora tereno destina solamente pa vivienda ta wordo uza pa actividad comercial. “Na Aruba tin un falta di cumplimento den general. Ta p’esey cu tur cos ta sali for di control,” e ehecutivo a expresa.

E ta cuestiona tambe con e preocupacion tocante overtourism ta combina cu esfuersonan pa atrae mas vuelo, incluyendo for di Argentina y Colombia. Segun e ehecutivo, capacidad di buelo lo aumenta cu 6% durante e proximo temporada di invierno.

SOSTEN PA DOÑONAN DI CAS Y ESNAN CU TA HUUR

E ehecutivo ta pone un serie di pregunta na e propuesta pa yuda doñonan di cas cu pago di hypotheek. E ta señala cu sosten pa interes por bin acerca di e deduccion fiscal di interes cu ya ta existi, mientras personanan cu ta huur un cas y ta paga huur halto no ta ricibi un sosten similar. “Pakico subsidia doñonan di cas dos biaha, cu asistencia pa interes y deduccion di interes, mientras esnan cu ta huur ta paga huur halto sin subsidio?” e ehecutivo a cuestiona.

Riba sostenibilidad, e ta reclama mas responsabilidad di Gobierno den tratamento di awa sushi, maneho di sushi y su propio consumo di awa y electricidad. E ta propone pa cobra esnan conecta na plantanan di tratamento y considera un contribucion via accijns riba combustible, relaciona cu uso di caminda.

E ehecutivo ta adverti tambe pa posible aumento fuerte di tarifanan di awa y electricidad si no tin proteccion contra fluctuacion di prijs di petroleo. Segun e, esaki por pone mas presion riba comercio.

E ta reconoce cu comercio tin responsabilidad pa ingreso y bienestar di su trahadornan, y pa e comunidad en general. Pero e ta insisti cu Gobierno tambe mester cumpli cu su parti.

“Crea un marco legal y comercio lo cumpli,” e ehecutivo a conclui.