Gobierno ta propone cobransa nobo pa turista pa financia 'Tourism 3.0'

ORANJESTAD — Gobierno ta contempla un serie di cobransa nobo y aumento di tarifanan relaciona cu turismo como parti di su draft Aruba Strategic Tourism Implementation Plan 2026–2031. E plan ta busca pa genera fondo pa resiliencia, proteccion di naturaleza, infraestructura y transformacion di sector turistico.

Un di e medidanan mas grandi ta un US$25 Sustainable Tourism and Resilience Fee pa turista di stay-over elegibel. Segun e calculacion den e plan, cu aproximadamente 1,55 miyon bishitante, e cobro por genera cerca di US$38,8 miyon pa aña. E placa lo wordo deposita den un National Tourism Resilience Fund y, segun e propuesta, no por wordo uza pa gasto rutinario di Gobierno.      

Ademas, e draft ta inclui un aumento di US$10 den Tourism Product Fee, cu ta calcula por genera aproximadamente Afl. 27,7 miyon pa aña, y un Marine Conservation Fee di US$25 pa actividadnan di buceo, cu ta calcula na aproximadamente Afl. 8,1 miyon. E fondonan aki ta destina principalmente pa proteccion di naturaleza y ecosistema marino.     

E plan ta menciona tambe un aumento di US$5 den cruise head tax, un aumento di environmental levy y un posible levy riba auto di huur, destina pa caminda, movilidad, mantenemento y mitigacion ambiental.     

Na mes momento, e plan ta conta cu mehora cobro di room tax, un aumento di un punto porcentual den room tax y un contribucion anual di Afl. 15 miyon di ATA pa financia e programa di transformacion 

E documento ta enfatisa cu e cifranan ta estimacion y mester wordo actualisa anualmente. Como cu e plan ainda ta un draft, implementacion di e cobransanan lo depende di decision politico, legislacion y aprobacion presupuestario.