A.T.A. y Aruba Excellence Foundation ta renoba colaboracion pa fortalece Aruba Certification Program

ORANJESTAD — Aruba Tourism Authority (A.T.A.) y Aruba Excellence Foundation (AEF) a firma un acuerdo nobo pa continua y amplia programanan educativo enfoca riba calidad di servicio y experiencia di bishitante na Aruba.

E acuerdo, firma pa Ronella Croes, CEO di A.T.A., y Monica Bos, presidente di Hunta di Supervision di AEF, ta inclui financiamento pa desaroyo y ehecucion di Aruba Certification Program (ACP) y otro actividadnan educativo relaciona cu e mision di AEF.

Aruba Excellence Foundation ta maneha e Aruba Certification Program desde 2018 y ta enfoca riba promove excelencia den servicio y hospitalidad. E programa ACP mes ta existi desde 2011 y ta prepara profesionalnan den sector turistico cu conocemento tocante cultura, historia, naturaleza y hospitalidad Rubiano.

Durante 2026 lo introduce un version renoba di ACP, cu contenido actualisa, metodonan moderno di siñamento y mas posibilidad pa entrenamento tanto presencial como digital. E meta ta pa mantene e programa relevante pa necesidadnan actual di industria turistico y fortalece calidad di servicio.

Segun A.T.A. y AEF, profesionalnan bon prepara ta esencial pa e experiencia di bishitante y pa competitividad di Aruba como destinacion turistico.