MEP ta pidi Parlamento pa tuma rol mas activo den discusion riba presion di turismo

ORANJESTAD — Lider di fraccion di MEP, Evelyn Wever-Croes, a pidi pa Comision Permanente di Turismo convoca urgentemente un reunion tocante e situacion actual di turismo na Aruba y e preocupacionnan creciente rond di overtourism.

Segun Wever-Croes, turismo ta crucial pa economia di Aruba, pero crecemento continuo ta pone cada biaha mas presion riba infrastructura, trafico, espacio publico, naturaleza, maneho di desperdicio y calidad di bida. MEP ta argumenta cu e pregunta no mester ta solamente cuanto turista Aruba por atrae, sino cua modelo di turismo e isla por sostene a largo plazo.

E fraccion ta boga pa un modelo di “High Value, Low Impact”, cu ta enfoca riba genera mas balor economico y social cu menos impacto riba espacio, infrastructura y naturaleza.

MEP a pidi pa Parlamento invita Aruba Tourism Authority (ATA), Aruba Hotel & Tourism Association (AHATA) y Aruba Timeshare Association (ATSA) pa discuti, entre otro, capacidad di Aruba, e estado actual di turismo y e condicionnan necesario pa move den direccion di un modelo mas sostenibel.

Wever-Croes a enfatisa cu e meta no ta pa busca culpabel, sino pa determina hunto cu stakeholders unda e limitacionnan ta y cua decisionnan ta necesario pa mantene turismo como fuente di prosperidad sin laga crecimiento economico bay a costo di calidad di bida di residentenan.