Dowers y comandante nobo di KMar ta enfoca riba frontera, crimen organisa y cooperacion regional

ORANJESTAD — Minister di Husticia Arthur Dowers a ricibi luitenant-kolonel Patrick Taribuka, comandante nobo di Brigade Caribisch Gebied di Koninklijke Marechaussee (KMar), pa un encuentro enfoca riba cooperacion den seguridad, control di frontera y lucha contra criminalidad transfronteriso.

Taribuka ta den funcion desde september 2026 y ta lidera e unidadnan di KMar riba e seis islanan Caribense den Reino. KMar tin presencia permanente den Caribe y ta coopera cu autoridadnan local, Kustwacht y cuerponan policial den lucha contra crimen organisa, fraude di documento y identidad y otro forma di criminalidad relaciona cu frontera.

Durante e encuentro cu Dowers, e enfoke tabata riba necesidad pa mantene un cooperacion fuerte entre e diferente partnernan di seguridad, mientras ta tene cuenta cu responsabilidad y necesidadnan specifico di Aruba.

KMar no solamente ta activo den control di frontera. E organisacion tambe ta brinda sosten cu personal, experticio y material y ta participa den e cadena di inmigracion, unidadnan di informacion y investigacionnan relaciona cu crimen transfronteriso. Un ehempel reciente na Aruba ta e investigacion di e accidente fatal di 13 di september, cu a pasa pa Marechaussee pa motibo di envolvimento militar.

E encuentro ta tuma lugar den un periodo caminda cooperacion judicial y di seguridad den Reino ta recibi atencion extra. Durante e reciente Justitieel Vierlandenoverleg, Aruba, Curaçao, Sint Maarten y Hulanda a acorda pa fortalece cooperacion contra diferente forma di criminalidad y pa coordina mihor riba reto comun di seguridad.

Dowers a desea Taribuka exito den su funcion nobo y a expresa confianza cu cooperacion entre Aruba y Koninklijke Marechaussee lo sigui profundisa.