22 barco ainda ta uza registro falso di Corsou; 54 den Reino ta afecta

WILLEMSTAD — Por lo menos 22 barco rond mundo ainda ta pretende falsamente cu nan ta registra na Corsou, segun dato maritimo di S&P Global di 18 di september. Hunto cu barco cu ta uza registro no autorisa di Aruba y Sint Maarten, actualmente tin 54 barco cu ta haci uso indebido di bandera of registro relaciona cu Reino Hulandes.

Di e total, 22 ta reclama registro di Corsou, 20 di Aruba y 12 di Sint Maarten. Na principio di aña e cifra tabata ainda mas halto: Hulanda a reporta 77 barco cu registro fraudulento liga na Reino na International Maritime Organization.

Autoridadnan ta adverti cu e reduccion no necesariamente ta nifica cu e problema ta disparciendo. Barconan relaciona cu e asina yama “shadow fleet” ta cambia frecuentemente nomber, doño, bandera y registro declara, mientras entrada fraudulento por desparece for di databasenan internacional despues cu nan wordo detecta.

Dos dia prome cu e dato di S&P Global, Lloyd’s List a identifica 59 barco cu falsamente tabata presenta nan mes como registra na Aruba, Corsou of Sint Maarten, di cual 24 tabata reclama Corsou.

Problema ta particularmente sensibel pa Corsou, pasobra contrario na Aruba y Sint Maarten, Corsou si tin un registro internacional di barco. Barconan cu ta legitimamente den e registro aki ta haya nacionalidad di Reino y por bula bandera di Reino Hulandes.

Segun informacion di Gobierno Hulandes, no tabatin tanker di petroleo den registro oficial di Corsou aña pasa. Esaki ta nifica cu tanker cu ta reclama registro di Corsou sin aparece den registro oficial ta uza documentacion fraudulento.

E fenomeno ta wordo conecta cada biaha mas cu “shadow fleets” uza pa evita sancion y supervision internacional, specialmente den comercio di petroleo Ruso y Iraniano.

Apesar di mas atencion internacional y control, e cifranan ta mustra cu nomber di Corsou, Aruba y Sint Maarten ainda ta wordo uza door di barco cu no tin ningun conexion legitimo cu nan registronan maritimo.