Aruba ta prepara siguiente consulta pa regla 30x30 di proteccion marino

ORANJESTAD — Directie Natuur & Milieu (DNM), Aruba Conservation Foundation (ACF) y Blue Marine Foundation (BMF) ta prepara un siguiente ronda di dialogo cu stakeholders den october como parti di e proceso 30x30 pa proteccion di ambiente marino di Aruba.

Despues di e prome ronda di consulta, e grupo di trabou a pasa lunanan trahando riba analisis tecnico, recopilacion di informacion, mapanan y diferente senario pa evalua con Aruba por protege mas cu 30% di su ambiente marino pa 2030.

E proceso ta inclui tanto awa teritorial como area offshore y zona economico exclusivo. DNM a enfatisa cu ainda no tin un ley definitivo. E meta ta prome reuni evidencia cientifico y feedback di stakeholders, pa eventual legislacion por wordo basa riba informacion solido.

Aruba Conservation Foundation a destaca cu proteccion marino no solamente ta importante pa biodiversidad, sino tambe pa economia di Aruba, mientras Blue Marine Foundation ta brinda apoyo tecnico y experiencia internacional.

Durante e consulta di october, stakeholders lo haya oportunidad pa evalua e diferente senarionan y duna nan aporte prome cu Gobierno determina e siguiente pasonan.