JETTEN NA ONU: “LAGA CORTE PENAL INTERNACIONAL NA PAZ”

NEW YORK — Prome Minister Hulandes Rob Jetten a uza su prome discurso como premier na Asamblea General di Nacionnan Uni pa defende Corte Penal Internacional (CPI) na Den Haag contra presion y posibel sancionnan nobo di Merca.

Sin menciona presidente Donald Trump directamente, Jetten a declara: “Laga Corte Penal Internacional y tur otro institucion cu ta proteha orden huridico internacional na paz.” Su palabranan a ricibi aplauso den sala.

Trump a critica CPI fuertemente y a califica e corte como un tribunal anti-Americano. Su gobierno ta opone, entre otro, e mandato di detencion contra premier Israeli Benjamin Netanyahu y investigacionnan relaciona cu actuacion di militarnan Mericano na Afghanistan.

Jetten a adverti cu sancionnan nobo contra CPI no solamente lo afecta e corte, sino por debilita e orden huridico internacional y pone relacion entre Merca y Europa bou di mas presion. E premier a pidi Union Europeo prepara pa por reacciona rapidamente si Washington realmente impone sancionnan adicional.

Durante su discurso, Jetten a haci un yamado tambe pa paisnan considera “potencianan intermedio” tuma un rol mas grandi den cooperacion internacional. Segun dje, paisnan di Latinoamerica, Asia y Africa mester haya mas influencia, incluyendo mas representacion Africano den Conseho di Seguridad di Nacionnan Uni.