Fase 2 di ahuste salarial pa educacion ta prepara pa despues di 2028

ORANJESTAD — Ministerio di Educacion ta sigui prepara fase 2 di e reforma salarial pa veld di educacion, cu ta enfoca riba simplifica e structura di salario, profesionalisacion continuo y revision di e sistemanan di crecemento salarial pa docente y asistente di klas.

Segun Minister Gerlien Croes, diferente departamento, sindicatonan y stakeholdernan ta participa den e proceso desde maart 2026. E trabou ta inclui revision di descripcion di funcionnan, investigacion riba edad maximo pa crecemento salarial y e posicion di asistentenan di klas cu actualmente ta den escala di docente. E grupo aki tambe lo ricibi un aumento salarial den fase 2.

Durante 2026 a tene diferente reunion y session di audiencia pa recoge input di veld di educacion. Unabes e concepto nobo di descripcion di funcion ta cla, lo presenta esaki na veld pa validacion.

E ministerio ta indica cu e reforma no ta limita na salario solamente. Tambe lo tene cuenta cu grandura di klas, sosten pa studiante y docente, profesionalisacion y posibilidad di introduci modelonan pedagogico y didactico cu ta cuadra cu necesidadnan moderno.

Fase 1 di e reforma a wordo formalisa den presupuesto 2026. E di dos pago di fase 1 ta programa pa 1 di januari 2028, mientras cu fase 2 ta proyecta pa inicia despues di 2028.