Aruba ta prepara mercado pa refinancia Afl. 941 miyon di debe bieuw

ORANJESTAD — Gobierno di Aruba ta prepara su mes pa refinancia Afl. 941 miyon di debe existente cu ta madura den 2027. Minister di Finansa Geoffrey Wever ta na Amsterdam pa acerca inversionistanan internacional y busca condicionnan mas faborabel pa e financiamento.

Wever ta participa na Private Placements Industry Forum Europe 2026 (PPIF-Europe), cu ta reuni inversionistanan institucional internacional. E meta di Aruba ta amplia su base di inversionista, fortalece relacionnan existente y prepara mercado prome cu pais tin cu busca financiamento.

Segun Gobierno, un parti di e Afl. 941 miyon lo wordo cubri cu Afl. 84 miyon di surplus. Pa e suma restante, Gobierno ta considera un combinacion di refinanciamento cerca institucionnan financiero local y inversionistanan internacional.

E strategia ta busca refinancia debe existente na un costo mas favorable y sigui baha e peso di debe publico. Gobierno ta proyecta cu e debt-to-GDP ratio di Aruba lo baha te na aproximadamente 59% pa final di 2027.

Durante PPIF-Europe, Wever lo reuni directamente cu inversionistanan pa presenta e perspectiva economico y fiscal di Aruba, prioridadnan di financiamento y plannan di desaroyo a largo plazo. Aruba tambe kier ricibi feedback di mercado prome cu inicia un proceso formal di financiamento.

“Pa un necesidad di re-financiamento di debenan di pasado di Afl. 941 miyon, Aruba no ta bay mercado sin ta bon prepara,” Wever a declara.

Gobierno ta busca tambe diversifica su fuente di financiamento. Tradicionalmente Aruba tin un presencia fuerte den mercado Mericano, pero awor e intencion ta fortalece acceso na capital Europeo tambe, pa crea mas competencia y baha dependencia di un solo mercado.

E participacion na Amsterdam ta sigui contacto cu inversionistanan na PPIF-Europe 2025 y PPIF Miami na 2026. Segun Gobierno, e meta ta mantene inversionistanan informa continuamente tocante desaroyo economico y fiscal di Aruba, en bes di acerca nan solamente ora pais tin necesidad di placa.