ABV na Noticiacla: ‘Problema di hospital ta mas grandi cu solamente salario’

ORANJESTAD — Despues cu director di Horacio Oduber Hospital, Jacco Vroegop, a desmenti e noticia cu hospital por no tin placa pa paga salario na november, presidente di sindicato ABV, Gina Maduro, tambe a reacciona na Noticiacla y ta enfatisa cu trahadornan mester haya informacion cla tocante e situacion real di hospital. Mes momento e la confirma tambe cu hospital a sigura cu no tin menasa cu no por paga salario proximamente. 

Segun Maduro, gerencia di hospital a prepara un town hall meeting recientemente pa netamente informa empleadonan directamente tocante e situacion financiero y e factornan cu ta causando presion riba funcionamiento di hospital.

“Durante e town hall meeting, gerencia a splica con e situacion a yega na e punto aki y kico ta causando e problema,” Maduro a indica.

E presidente di ABV ta señala cu e problema no ta solamente un pregunta di salario, pero tambe di capacidad pa produci y entrega cuido. Segun  e, reduci produccion tampoco ta un decision simpel, particularmente ora demanda pa cuido ta sigui halto y hospital mester atende personanan cu mester tratamento.

Maduro a pone enfasis tambe riba e relacion entre hospital y AZV. Segun e, e contrato entre ambos partido mester determina claramente no solamente e calidad di cuido, pero tambe e prijs y volumen di servicio cu AZV ta cumpra.

“Si tin un contrato cu AZV, mester ta cla kico ta wordo cumpra, cuanto cuido mester wordo entrega y cuanto esaki mester costa,” Maduro a expresa.

E reaccion di ABV ta sigui riba e desmentido di Vroegop, kende a bisa na Noticiacla cu no tin un amenaza inmediato pa pago di salario. Segun e director, si e fondo disponible no ta suficiente, hospital lo limita cuido regular y planeabel prome cu e yega na un situacion caminda salario no por wordo paga.

Pa e sindicato, e preocupacion principal awor ta cu trahadornan haya claridad directamente di gerencia y cu e discusion entre Hospital, AZV y Gobierno no keda solamente riba cifra, pero tambe considera e consecuencia pa personal y paciente.

Maduro a indica cu e town hall meeting mester sirbi precisamente pa pone e situacion na claro pa empleadonan y pa splica kico hospital ta enfrenta y cua opcionnan tin riba mesa.

E mensahe di ABV, pues, ta cu e alarma tocante salario no mester wordo mira separa for di e problema mas grandi: si financiamiento no ta suficiente, e presion finalmente lo cay riba cantidad di cuido cu hospital por ofrece y riba e trahadornan cu mester entrega e cuido ey.