John Hart (AVP) ta exigi claridad riba investigacion di Refineria di Aruba

ORANJESTAD — Parlamentario di AVP John Hart a pidi Gobierno claridad tocante e investigacion independiente cu Parlamento a ordena riba tur acontecimento relaciona cu Refineria di Aruba entre 2018 y 2025.

E mocion, aproba na augustus 2025, a pidi pa e investigacion cuminsa dentro di tres luna y examina entre otro e situacion financiero y operacional di RDA, acuerdo cu Citgo, proyectonan anuncia pa LNG y refineria modular, y e deterioro di facilidadnan y ekiponan.

Awor Hart ta pidi Minister di Energia pa informa si e investigacion a cuminsa oficialmente, ken ta ehecuta esaki, si tin atraso y ki ora Parlamento por spera e resultadonan.

Segun Hart, Parlamento a duna un instruccion cla y Gobierno tin obligacion di explica con e mocion ta wordo ehecuta.

“Pueblo tin derecho di sa kico a pasa cu e refineria, con recursonan publico a wordo maneha y cua decisionnan a wordo tuma,” Hart a expresa.