Trump ta comparti mapa cu bandera Mericano cubriendo gran parti di Caribe

WASHINGTON — Presidente Mericano Donald Trump a comparti   un mapa riba Truth Social unda practicamente henter Norte America y un gran parti di Caribe ta cubri cu bandera Merca. E no a agrega ningun texto ni explicacion, no clarificando si e imagen ta un mensahe politico, provocacion of simplemente un imagen simbolico.

Riba e mapa, “United States of America” ta aparece cu letter grandi riba e continente, mientras Canada, Mexico, Groenlandia, parti di Centro America y varios isla Caribeño ta aparece bao e Stars and Stripes. Golfo di Mexico ta indica como “Gulf of America”.

Medionan Frances a reacciona particularmente paso territorionan Frances den Caribe, manera Guadeloupe, Martinique, Saint-Martin y Saint-Barthélemy, tambe ta aparece den color Mericano. Cuba, Haiti, Jamaica, Republica Dominicana, Bahamas y varios pais di Centro America tambe ta parce inclui.

Trump no a anuncia ningun plan pa anexa e paisnan of territorionan mostra riba e mapa, y Gobierno Mericano tampoco no a presenta tal politica. Pesey e imagen no por wordo considera automaticamente como un reclamo territorial oficial.

Sinembargo, e ta cuadra cu declaracionnan anterior di Trump tocante Groenlandia y Canada, cu el a describi anteriormente como un posible estado numero 51 di Merca.

Pa Aruba, Corsou, Boneiro, Sint Maarten, Saba y Sint Eustatius, e mapa no ta suficientemente preciso pa determina si nan ta inclui especificamente. Pero ta cla cu un gran parti di e arco Caribeño ta aparece cubri cu bandera Mericano.