Aruba Birdlife Conservation ta mantene caso di UTV y ATV: “Nos no ta cancela”

ORANJESTAD — Mientras  cu e tension diamars anochi a sigui crece rond di e futuro di e rutanan pa UTV y ATV na costa noord y cu e sector ta sigui protesta y exigi un solucion, Aruba Birdlife Conservation (ABC) a confirma diamars anochi directamente na Noticiacla cu, di su banda, e organisacion no lo retira e caso judicial contra Gobierno di Aruba.

E CASO

E caso, programa pa diaranson 10 di september, ta relaciona cu e.o.  e pasashi y uzo di costa noord pa tour di UTV y ATV. Durante e ultimo dianan, incertidumbre a aumenta si e procedimiento lo sigui of si eventualmente lo por wordo cancela pa laga espacio pa Gobierno negocia un salida diferente cu e sector. 

ABC TA BAY CORTE!

Pero ABC diamars anochi a kita duda tocante su propio posicion. “ABC no ta cancela e caso,” representantenan di e organisacion a bisa Noticiacla diamars anochi. “E huez lo dicidi si e caso ta sigui, finalmente.” Segun ABC, e determinacion pa sigui cu e caso a bira ainda mas fuerte despues di e reaccionnan cu presidente di e organisacion a ricibi, particularmente riba social media. “E cantidad di odio, instigacion, manipulacion, menasa y hopi mas cu presidente di ABC (Greg Peterson:red) a ricibi, entre otro riba social media, ta haci e determinacion pa sigui cu e caso mas fuerte cu nunca,” representantenan di ABC a declara.

Nan a sigui bisa cu, den nan opinion, no por permiti cu presion of instigacion determina con Aruba mester trata proteccion di su naturaleza. “Ningun hende mester laga instigadornan asina sigui destrui naturaleza di Aruba, sector turistico di Aruba ni integridad di Aruba,” ABC a agrega.

NO TA RETIRA CASO

Cu e declaracionnan aki, ta bira cla cu ABC no tin intencion di retrocede of retira e caso pa duna Gobierno espacio pa busca solamente un solucion politico of negocia otro salida cu sector. E desaroyo ta bin mientras sector di UTV y ATV ta sigui pone presion riba Gobierno. Den dianan pasa, operador y representantenan di sector a protesta, incluso cu un accion na rotonde Las Américas. Minister di Vivienda, Infrastructura, Servicio Interno y Telecomunicacion, René Herdé, a bay personalmente na e sitio pa papia cu e grupo.

Gobierno y representantenan di sector tambe a sigui den dialogo, y Herdé a indica cu e combersacionnan ta avansando den bon esfera. Como parti di e proceso, Gobierno ta trahando riba formacion di un comision cu representacion amplio di sector pa busca solucionnan concreto.

RUTA ALTERNATIVO

Paralelamente, DOW y DIP ta trahando riba posibilidad di un ruta alternativo pa tour, pa trata di concilia proteccion di naturaleza cu continuidad di actividad economico y empleo den sector di UTV y ATV.

Sinembargo, confirmacion di ABC diamars anochi ta haci cla cu e proceso hudicial no ta bai desaparece simplemente como consecuencia di e negociacionnan politico y protesta publico.

E siguiente momento crucial ta awor diaranson. ABC ta mantene su caso, Gobierno ta defende su posicion, y finalmente ta huez cu lo determina si e asunto lo sigui su curso den corte. E gruponan a bisa cu mas tarda diaranson, nan kier tende di gobierno si e caso ta sigui of no. ABC mientrastanto tin su contesta. Awor ta keda na huez si e caso ta sigui realmente of no. 

Pa sector di UTV y ATV, Gobierno y organizacionnan ambiental, e decision por bira un punto importante den e discusion mas amplio tocante con Aruba kier proteha su costa noord, mientras na mes momento ta busca mantene un sector turistico cu ta duna trabou y entrada na diferente famia.