Wever ta rechasa critica di promesa kibra: “Nos a baha accijns riba gasoline y diesel”

ORANJESTAD – Durante un reciente edicion di Noticiacla LIVE, periodista Tito Laclé a confronta Minister di Finansa Geoffrey Wever cu un di e criticanan cu ta sigui rondona Gobierno: cu durante campaña electoral tanto AVP como FUTURO a priminti baha e prijs riba gasoline y diesel, pero cu consumidor ainda no ta sinti cu e promesa ey a wordo cumpli.

Laclé a pone e pregunta directamente den cuadro di e promesanan electoral: si Gobierno realmente por bisa cu a cumpli, mientras prijs di combustible ainda ta representa un gasto importante pa famianan Arubano.

Wever a rechasa e promesa cu Gobierno no a cumpli. Segun e mandatario, FUTURO desde principio a compromete su mes cu un reduccion di e carga fiscal riba combustible y, ora e prome presupuesto a wordo prepara, Gobierno a busca espacio inmediatamente pa baha accijns. “Ora nos a traha y aproba e prome presupuesto, nos a busca manera inmediatamente pa inclui un reduccion di accijns riba gasolina y diesel. E reduccion aki ta conta pa cada liter.”

GOBIERNO A CUMPLI 

Segun Wever, pa e punto specifico aki Gobierno por bisa cu a entrega riba su promesa. “Riba e punto ey nos a cumpli cu loke nos a priminti: baha accijns riba gasolina y diesel.” Laclé su confrontacion, sinembargo, ta toca un diferencia importante entre baha impuesto y baha prijs final na pomp. Un reduccion di accijns por representa un alivio fiscal, pero e consumidor finalmente ta evalua e promesa na base di loke e ta paga pa liter. Wever a argumenta cu Gobierno no a keda solamente cu e reduccion di accijns. Ora conflicto na Iran a pone prijs internacional di combustible bou di presion, Gobierno, segun e mandatario, a busca espacio adicional den presupuesto pa evita cu henter e aumento pasa pa consumidor. “Finalmente nos a logra aloca 10 miyon florin pa sigui mitiga e impacto riba prijs di gasolina y diesel.” P’esey e minister a rechasa e critica cu Gobierno no a haci nada. “Mi no ta di acuerdo cu e afirmacion cu Gobierno no a haci nada of no a cumpli cu su promesa.”

KI ORA UN PROMESA TA CUMPLI?

E intercambio riba Noticiacla LIVE a laga e discusion centra riba un pregunta mas fundamental: ki ora un promesa di baha prijs por wordo considera cumpli? Pa Wever, Gobierno a cumpli door di baha accijns y despues destina Afl. 10 miyon pa amortigua subida internacional. Pa e consumidor, e prueba probablemente ta mas simpel: cuanto cen menos nan ta paga na pomp compara cu loke nan lo a paga sin e medidanan. E debate, pues, no ta solamente si Gobierno a tuma accion, sino si e accion ey ta suficiente pa cumpli cu expectativa cu campaña electoral a crea entre pueblo.