Empresanan arubano mas positivo, pero confianza den construccion ta cay

ORANJESTAD – Confianza di empresanan arubano den economia a aumenta durante segundo kwartaal di 2026, pero sector di construccion ta forma un excepcion notable. Su indice di confianza a cay di 110 pa 97, bou di e nivel neutral di 100.

Esaki ta sali for di e ultimo Business Perception Survey di Banco Central di Aruba (BCA). Pa e sector empresarial en general, e indice a subi di poco mas di 104 pa casi 108. Ningun di e empresanan encuesta ta spera contraccion economico den e proximo 12 luna; casi 44% ta preve crecemento.

Resultadonan tambe ta positivo pa venta, ganashi y empleo. Mas di 92% di empresanan ta reporta ganashi, casi 70% a mira nan ganashi aumenta y casi tres cuarta parti ta reporta mas venta. Cerca di 54% a aumenta cantidad di empleado.

Construccion, sinembargo, ta mustra un imagen diferente. Tanto evaluacion di situacion actual como expectativa a corto plazo a cay rond di 97. BCA no ta duna un splicacion pa e cambio fuerte.

Den inversion tambe tin cierto cautela. Casi tres cuart parti di empresanan tin plan pa inverti den e proximo 12 luna, pero e proporcion cu ta pensa inverti mas cu Afl. 5 miyon a baha di mas di 31% pa poco mas di 20%.