Descontento politico mas fuerte na Savaneta entre esnan di 55–64 aña

ORANJESTAD – E encuesta politico di Noticiacla mas recien ta mustra un sentimiento amplio critico tocante rumbo actual di Aruba. Di 407 persona cu a contesta e pregunta, 73,7% ta bisa cu Aruba no ta bayendo den direccion correcto, contra solamente 18,7% cu ta pensa cu si. E evaluacion general di situacion politico ta sigui e mesun tendencia. 67,8% ta califica situacion politico como “malo” of “hopi malo”, mientras solamente 8,8% ta calific’e como bon of hopi bon.

GABINETE AVP-FUTURO

Tocante Gabinete AVP–FUTURO, 68,3% ta insatisfecho of hopi insatisfecho. Ademas, casi tres di cada cuater respondente — 74,8% — ta bisa cu Gobierno ta cumpli menos of hopi menos cu nan expectativa.

DESEO PA CAMBIO

E deseo pa cambio ta especialmente notable. Ora a puntra directamente kico nan ta prefera awe, 49,6% a opta pa cambio di Gobierno y otro 27,8% pa un coalicion diferente. Solamente 17,2% ta prefera continuidad cu Gobierno actual.

OPOSICION NO TA UN ALTERNATIVA

Pero e descontento cu Gobierno no automaticamente ta traduci den confianza total den oposicion. Aunke 46,1% ta bisa cu nan tin mas confianza den oposicion pa maneha futuro di Aruba, solamente 30,1% ta considera oposicion “definitivamente” un alternativa creibel. Otro 20,8% ta bisa “mas o menos”, mientras 33% directamente ta bisa no.

Mirando e encuesta segun edad, e sentimento critico ta specialmente fuerte entre respondentenan di 55–64 aña. Den e grupo aki, 78,2% ta bisa cu Aruba ta bayendo den direccion robes, 71,6% ta insatisfecho cu Gobierno y 80,6% ta bisa cu Gabinete ta cumpli menos cu nan expectativa.

Entre 65+ tambe tin fuerte descontento: 76,1% ta considera rumbo di pais incorrecto y 67,1% ta insatisfecho cu Gobierno.

E grupo di edad di 45–54 ta algo menos negativo riba algun pregunta, pero ainda 66,7% ta bisa cu rumbo ta robes y 73,8% ta considera cu Gobierno ta cumpli menos cu expectativa.

SAVANETA DESCONTENTO 

Geograficamente, Savaneta ta sobresali como e districto cu e señal mas fuerte di descontento. Ey, 81,6% di respondentenan ta bisa cu Aruba no ta bayendo den direccion correcto y 86,8% ta considera cu Gobierno ta cumpli menos cu nan expectativa. Noord ta sigui cu 78% cu ta considera rumbo di Aruba incorrecto, mientras Santa Cruz ta registra 76,3%. Paradera ta na 75,3%, San Nicolas 71,9% y Oranjestad 65%. Santa Cruz tambe ta registra un nivel halto di insatisfaccion directo cu Gabinete, cu 76,3%, sigui pa Paradera cu 71,4%, Savaneta cu 69,2% y Noord cu 67,9%. Un otro señal fuerte ta cu oposicion tin mas confianza cu Gobierno den tur seis districto den e muestra. Pero e diferencia entre “confianza den oposicion” y “oposicion ta un alternativa creibel” ta importante: pueblo por ta busca cambio sin necesariamente ta completamente convencido di e alternativa.

ELECTORADO DESCONTENTO CU GOBIERNO

E resultadonan, por lo tanto, ta pinta un electorado cu ta mas descontento cu Gobierno cu entusiasma cu oposicion. E demanda principal cu ta sali for di e encuesta no ta simplemente pa otro partido, sino pa un cambio den rumbo.

VOTO PA PARTIDO 

Den intencion di voto, MEP ta aparece prome den e muestra cu 44,6%, sigui pa 17,1% cu ainda no sa. AVP ta na 9%, FUTURO 5,6% y PPA 4,1%. Sinembargo, e resultado aki no mester wordo interpreta como un pronostico electoral: e encuesta no ta un muestra completo di poblacion y e participacion ta fuertemente concentra den edadnan mas halto solamente.