Gobierno ta presta Afl. 50 miyon di SVB pa refinancia debe

ORANJESTAD – Gobierno di Aruba a yega na un acuerdo cu SVB pa presta Afl. 50 miyon pa un periodo di tres aña, cu un interes di 3%. E prestamo ta forma parti di e strategia di Gobierno pa refinancia debe existente cu ta vence durante 2026.

Esaki a wordo splica den un entrevista cu 24ora.com, unda a indica cu Aruba mester refinancia alrededor di Afl. 648 miyon na debe durante 2026. Ta trata di debe contrae anteriormente cu ta yega na su fecha di vencimento, y no di Afl. 648 miyon na debe nobo.

Na principio di aña, Gobierno a acudi na mercado internacional pa presta US$160 miyon pa refinancia parti di su debe externo. Ademas, alrededor di Afl. 150 miyon na debe domestico mester wordo refinancia.

Segun e splicacion duna na 24ora.com, Ley di Supervision Financiero, LAFT, ta prescribi cu surplus den sector colectivo mester wordo usa pa contribui na reduccion di debe di Pais Aruba. Den e cuadro aki Gobierno a yega na un entendemento cu SVB pa e prestamo di Afl. 50 miyon.

E construccion, segun Gobierno, tin beneficio pa ambos banda. SVB ta haya un rendimento di 3% riba e placa cu e tin disponibel, mientras Gobierno ta logra refinancia un parti di su debe na un interes relativamente abou y asina reduci su carga di interes.

Despues di e Afl. 50 miyon di SVB, ainda ta resta alrededor di Afl. 100 miyon pa refinancia. Gobierno ta preparando un emision di bono riba mercado financiero local pa cubri e suma aki.

Den e entrevista a enfatisa cu no ta trata di falta di placa of di un prestamo extra pa aumenta gasto di Gobierno. Segun Gobierno, tin suficiente liquidez den sistema financiero local y e operacionnan ta destina pa refinancia debe existente cu ta vence.

Gobierno tambe ta proyecta cu proporcion entre debe publico y Producto Interno Bruto lo baha te na alrededor di 54%, segun cifranan inclui den presupuesto 2027 entrega recientemente na Raad van Advies.

Segun Gobierno, esaki ta demonstra cu, mientras Aruba ta sigui refinanciando debe cu ta vence, e nivel di debe compara cu tamaño di economia ta sigui bahando.