Rocco Tjon(MEP): Gobierno a cera caminda sin consulta ni plan alternativo

ORANJESTAD – Parlamentario Rocco Tjon (MEP) a critica e decision di Gobierno pa cera e caminda tras di Tierra del Sol, afirmando cu e medida a wordo tuma sin un estudio di impacto, sin consulta cu stakeholdernan y sin presenta un plan alternativo.

Segun Tjon, e carta di Aruba Offroad Foundation ta indica cu aproximadamente 1.000 persona por wordo afecta, incluyendo empresarionan chikito, guianan turistico, operadornan y nan famianan cu ta depende di e actividad pa nan ingreso diario.

E parlamentario a expresa preocupacion no solamente riba e decision, sino tambe riba e proceso cu a sigui. Segun e, un gobierno mester dialoga cu e partidonan involucra y evalua e consecuencianan economico prome cu tuma decisionnan cu tin tanto impacto.

Tjon a señala cu Aruba Offroad Foundation a propone un alternativa den forma di un ruta unico cu control y supervision, cu segun e fundacion por proteha naturalesa sin afecta empleo. Te awor, segun e parlamentario, Gobierno no a responde riba e propuesta.