Aduana: No mester ta inscribi na Censo ainda pa haya vrijstelling di verhuisboedel

ORANJESTAD – Departamento di Aduana a clarifica cu un persona no ta perde e derecho riba vrijstelling pa verhuisboedel simplemente pasobra e inscripcion na Censo ainda no a wordo completa. Pa evita retraso y gastonan adicional durante mudanza pa Aruba, Aduana ta aplica un procedura temporal mientras e inscripcion ta den proceso.

E procedura ta varia segun e situacion di e aplicante, sea un Hulandes cu ta bin traha na Aruba, un Arubiano cu ta bolbe for di exterior, of un stranhero cu tin permiso valido pa traha. Den tur caso, despues di presenta prueba di inscripcion na Censo y cumpli cu e condicionnan legal, e importacion temporal lo wordo cambia pa un importacion definitivo cu vrijstelling di verhuisboedel. Stranheronan cu a deposita un borgstelling lo ricibi esaki bek.

Aduana ta indica cu tur customs brokers conoce e procedura y por guia nan clientenan pa evita gastonan innecesario, manera gastonan pa retraso di container . Pa mas informacion, Aduana ta recomienda tuma contacto cu un customs broker of directamente cu e departamento.