RICa: Aruba ta e di 5 pais cu ta mas resiliente den Caribe

ORANJESTAD – Aruba a logra un posicion fuerte den e prome Resilience Index Caribbean (RICa), un indice nobo cu ta midi con resistente economia di paisnan caribeno ta contra crisis y otro golpi economico. Aruba a termina na e di cinco lugar, convirtiendose su mes den un di e economianan cu ta mas resiliente den e region.

Segun e informe, solamente Jamaica, Barbados, Belize y Trinidad y Tobago a logra un score mas haltu cu Aruba. Corsou a termina na e di seis lugar, mientras St. Maarten a keda muchu mas abou, na e di 16 lugar.

E investigacion ta indica cu Aruba su fortaleza principal ta su Estado di Derecho fuerte, su ubicacion fo'i e zona di horcan, un PIB pa habitante relativamente halto y inflacion stabil.

Sinembargo, e informe tambe ta señala cu Aruba ta vulnerabel pa motibo di su dependencia grandi di turismo y importacion, y pasobra e pais tin un sector primario chikito.

Den comparacion cu Corsou, Aruba ta sobresali cu un economia mas fuerte, un PIB pa habitante mas halto y un situacion macroeconomico mas stabiel. Segun e informe, e mayor oportunidad pa mehora, ta den aumenta participacion den mercado laboral y inverti mas den energia renobabel.