CBS: Inflacion na Aruba a subi te 2.4% den juni

ORANJESTAD – E Indice di Prijs di Consumo (CPI) di Aruba a subi cu 0.1% den luna di juni 2026, mientras cu e tasa anual di inflacion a alcanza 2.4%, segun e ultimo cifranan publica door di Oficina Central di Estadistica (CBS).

E aumentonan cu a tin e mayor impacto riba e CPI tabata den e sectornan di mobilario (5.0%), transporte (1.0%) y restante bienes y servicio (1.1%). Di otro banda, e sector di comunicacion a registra un caida di 3.8%, principalmente pa motibo di un fuerte baha den prijs di ekiponan di telefon y fax.

CBS tambe ta informa cu e inflacion basico (sin conta energia y cuminda) ta 0.8%. E indice di energia a baha cu 1.4%, mientras cu e indice di cuminda a subi cu 1.5%.

E bestaansminimum pa un hogar cu dos adulto y dos mucha a baha levemente te Afl. 5,639, mientras cu pa un adulto so e ta Afl. 2,685. Comparando cu un aña pasa, sinembargo, e costo di bida pa un famia promedio ainda ta Afl. 130 mas halto.