Opinion: Casnan di cuido mester pone siguridad di adulto mayor prome

Pa Melva Croes-Yanes 

Un incidente reciente den un cas di cuido na Tanki Leendert a rebiba e debate tocante siguridad y calidad di cuido pa adultonan mayor na Aruba. Segun e opinion, e suceso no ta un incidente aisla, sino un señal cu tin problemanan structural cu mester atencion urgente.

E autor ta argumenta cu casnan di cuido regular no ta ekipa ni prepara pa atende persona cu adiccion severo of crisis mental, specialmente ora esakinan ta comparti espacio cu adultonan mayor vulnerabel. Segun e, e combinacion aki por aumenta e riesgo di agresion, inseguridad y negligencia.

Den e opinion ta haci un yamado na Gobierno y e autoridadnan competente pa revisa e maneho actual di casnan di cuido. Entre e propuestanan tin cu separa diferente tipo di pashent, fortalece protocolonan di admision, mehora supervision y evalua regularmente e capacidad di gerencianan pa garantisa un ambiente sigur.

E autor tambe ta recorda cu Fundacion Alzheimer Aruba ta trahando desde 2012 contra abuso di adulto mayor y ta señala cu kehonan di abuso y negligencia ta sigui wordo reporta. Segun e opinion, hopi victima no ta denuncia pa motibo di miedo of temor di represalia.

 Finalmente, e opinion ta enfatisa cu adultonan mayor tin derecho na un cuido digno, respetuoso y sigur. E autor ta sostene cu Ministerio di Salud, hunto cu Inspectie Volksgezondheid Aruba (IVA), tin e responsabilidad legal y moral pa garantisa control efectivo riba casnan di cuido y actua decisivamente contra abuso y negligencia.