MEP: Oposicion mester haya trato igual den Parlamento

ORANJESTAD – Fraccion di MEP a critica Presidente di Parlamento Marlon Sneek, alegando cu peticionnan presenta pa e oposicion no ta wordo trata igual cu esnan di e partidonan di coalicion.

Segun e fraccion, for di januari 2025 MEP a presenta 41 peticion pa reunionnan y ora di preguntanan, di cual solamente 11 a wordo atendé. MEP ta bisa cu Parlamento ta pertenese na pueblo y no na coalicion, y cu e manera cu peticionnan di oposicion no ta wordo agenda ta limita e derecho di control y debate democratico.

Lider di fraccion Evelyn Wever-Croes a pidi mas transparencia, criterianan objetivo y trato igual pa tur fraccionnan, enfatizando cu un democracia fuerte mester garantisa cu tur bos por wordo scucha.