Dennerich Kelly(AVP): “Nos pueblo merece informacion cu ta crea comprension”

ORANJESTAD – Parlamentario Dennerich Kelly a pidi mas claridad y miho comunicacion tocante e discusion riba e cobertura di AZV pa test preventivo di cancer di tripa grandi. Segun e, ciudadano tin derecho di haya informacion cla y comprondibel tocante decisionnan den cuido di salud.

Kelly, kende tambe ta enfermero di profesion, a splica cu decisionnan medico mester basa riba e situacion individual di cada pashent y no solamente riba su edad. El a señala cu den hopi paisnan e screening preventivo normalmente ta para rond di 75 aña, pero cu un test ainda por wordo haci si e medico ta considera cu lo beneficia e pashent.

Segun Kelly, e protocolnan actual ta basa riba evidencia cientifico internacional, pero esaki no ta elimina e necesidad pa Gobierno y profesionalnan di salud comunica e motibonan di nan decisionnan cu mas transparencia. El a conclui cu bon cuido di salud ta cuminsa cu bon comunicacion y cu respet, claridad y confianza ta esencial pa e relacion entre pashent y profesional medico.