CBA ta enfoca supervision riba e institucionnan financiero cu e riesgonan mas grandi

ORANJESTAD – Banco Central di Aruba (CBA) ta sigui fortalece su supervision riba e sector financiero door di aplica un sistema basa riba riesgo. Segun e Financial Sector Supervision Report 2025, e metodo aki ta permiti CBA dirigi su recurso limitanan na e institucionnan y area cu tin e mayor riesgo.

Desde 2017, CBA ta uza un sistema di supervision cu no solamente ta reacciona ora problema ya a presenta, sino cu ta enfoca riba identifica y atende e causa principal di e riesgo prome cu e situacion empeora.

CBA ta evalua regularmente diferente aspecto di banco, companianan di seguro y fondo di pension, incluyendo posicion financiero, gobernansa corporativo, maneho di riesgo, controlnan interno, cumplimiento di ley y riesgo relaciona cu tecnologia di informacion (IT).

Segun e informe, e riesgonan mas importante identifica pa e institucionnan financiero ta gobernansa corporativo, maneho di riesgo, calidad di portafolio di inversion, controlnan interno, riesgo cibernetico, solvencia, liquidez, rentabilidad y calidad di prestamonan.

Durante 2025, CBA a continua cu inspeccionnan na e lugar, revision di informenan financiero y reunionnan regular cu institucionnan supervisa. E combinacion di controlnan fisico y supervision remoto ta forma e base principal di su trabou di supervision.

SUPERVISION CONTRA CRIMEN FINANCIERO

Ademas di supervision financiero, CBA tambe ta aplica un sistema basa riba riesgo pa combati labamento di placa, financiamiento di terrorismo y proliferacion di arma. E evaluacionnan ta analiza tanto e riesgo natural di cada sector como e efectividad di controlnan interno cu institucionnan tin implementa.

Den 2025, CBA a haci encuesta den varios sector, incluyendo banco, cooperativanan di credito, companianan di seguro di bida, proveedor di servicio fiduciario, fondo di pension, companianan di transferencia di placa, corredor di seguro y notarionan.

Basa riba e resultado di e evaluacionnan, CBA a realiza cinco inspeccion  special durante e aña.

CYBERRIESGO TA BIRA PRIORIDAD

E informe ta mustra cu cybercriminalidad ta un di e menaza cu ta crece mas rapido pa e sector financiero. P'esey CBA a aumenta e enfoke riba supervision di tecnologia.

Segun Banco Central, cada institucion financiero tin responsabilidad directo pa proteha su sistema digital. Sinembargo, CBA ta controla si nan ta cumpli cu e reglamentonan tocante maneho di riesgo tecnologico, continuidad di negocio y outsourcing di servicionan IT.

Meta di CBA ta sigui fortaleciendo e resiliencia digital di e sector financiero y limita e impacto di posible cyberataquenan.