Corsou ta conquista titulo di Senior League Caribe y clasifica pa Mundial

WILLEMSTAD – Corsou a corona su mes como campeon di e Campeonato Caribe di Senior League Baseball despues di vence Puerto Rico cu score di 5-3 den e gran final, hunga diasabra 4 di juli na Tio Daou Ballpark.

Representante di Liga Pabou a recibi e bandera oficial como campeon di Caribe y awor lo representa e region durante e Senior League World Series, cu lo tuma lugar for di 1 te cu 8 di augustus na Easley, South Carolina.

Corsou a completa e torneo invicto, ganando tur cinco partido: tres den e ronda regular, e semifinal contra Corsou Pariba y finalmente e gran final contra Puerto Rico.

Pitchernan di relevo Zaid Martinus y Jaydlynn Wiel tabata decisivo pa mantene Puerto Rico controla. Wiel a logra e victoria despues di tira tres inning perfecto, sin permiti hit ni carrera y ponchando cinco bateador.

Na ofensiva, Joshua Acosta a conecta dos hit den tres turno na bate, mientras cu Daniel Perez a pega un triple decisivo den e di seis inning pa rompe e empate di 3-3.

Corsou a cuminza e partido cu un bentaha di 2-0, pero Puerto Rico a pasa dilanti 3-2 den e di cuatro inning. E ekipo local a empata mesora y den e di seis inning a anota dos carrera decisivo pa finalmente asegura e victoria y e campeonato.

Ora e ultimo out a cay, e celebracion a cuminsa riba e terreno di juego, marcando un logro importante pa beisbol di Corsou.