BBC: Historia di fam di Denzel Dumfries tin raiznan na Aruba

ORANJESTAD – Aunke futbolista hulandes Denzel Dumfries a nace na Hulanda, su fam tin un historia unico cu ta conecta Scotland, Surinam y Aruba. Esaki ta sali na cla den un articulo publica pa BBC News, unda e famia ta comparti e origen extraordinario di e nomber.

Segun su familiar Suzette Dumfries, cu ta di Aruba, e fam Dumfries a surgi den Surinam durante e periodo di sclavitud. Ora sclavitud a wordo abolí na 1863, un homber sclavisa cu tabatin Dumfries como su prome nomber a adopta e nomber ey como fam di su descendientenan.

E conexion cu Aruba a cuminsa den e añanan cuarenta, ora George Remus Dumfries, wela di Denzel, a muda for di Surinam pa Aruba. Na Aruba el a yuda funda Mon Plaisir School na Oranjestad. Cu paso di tempu, e fam Dumfries a bira hopi conoci riba e isla y, segun Suzette, Aruba por ta e lugar den mundo cu tin e concentracion mas halto di personanan cu e fam Dumfries.

E articulo di BBC ta pone enfasis tambe riba e orguyo cu hopi Arubiano ta sinti pa Denzel Dumfries. Cu su participacion den Mundialnan, Campeonato Europeo y e mas grandi competicionnan di club na Europa, e futbolista hulandes ta duna visibilidad internacional na un fam cu tin un parti importante di su historia na Aruba.

Pa Suzette Dumfries, e historia aki ta mustra cu un fam por viaha for di Scotland pa Surinam, despues pa Aruba, Hulanda y finalmente riba e escenario mundial, convirtiendo Denzel Dumfries den un simbolo di posibilidad y orguyo pa hopi Arubiano.