FIU-Aruba: Total di 61,704 transaccion inusual a keda reporta na 2025

ORANJESTAD – Financial Intelligence Unit Aruba (FIU-Aruba) a ricibi 61,704 report di transaccion inusual durante 2025. Esaki ta un aumento di 10.4% compara cu 2024, segun e Annual Report 2025 di Financial Intelligence Unit Aruba, publica e siman aki. Recientemente e director aki na Aruba Angelo Brete a papia di esaki, pero awor e cifranan ta completo y concreto segun e rapport oficial. 

SISTEMA DI RAPORTA TRANSACCION STRAÑO TA CRECE NA ARUBA 

E cifra ta mustra cu e sistema di raporta transaccion sospechoso of inusual ta sigui crece na Aruba. Segun FIU, e raportnan aki ta forma base pa identifica patronchi financiero, posible lavado di placa, financiamiento di terrorismo, financiamiento di proliferacion y otro delito relaciona.

48 RAPPORT 

Durante 2025, FIU-Aruba a traha riba 76 caso di inteligencia financiero. Di e casonan aki, 48 a resulta den Financial Intelligence Reports cu a wordo comparti cu autoridadnan competente, tanto na Aruba como internacionalmente. E raport ta indica cu e demanda pa inteligencia financiero ta creciendo. Mas analisis a wordo haci riba peticion di autoridadnan nacional, locual ta mustra cu investigadornan ta usa informacion financiero cada bes mas como parti di proceso investigativo.

Segun FIU-Aruba, efectividad no ta wordo midi solamente door di cantidad di report, pero door di resultado: si e informacion ta yega na tempo, si e ta di calidad, y si autoridadnan ta us’e pa combate crimen financiero. Click AKI pa lesa e rapport completo