Gobierno ta inverti Afl. 7 miyon den FMSA pa evita aumento di prijs di gasoline

ORANJESTAD – Gabinete AVP-FUTURO a aproba un inversion strategico di Afl. 7 miljoen cu, segun Gobierno, ta esencial pa proteha e seguridad energetico di Aruba, mantene continuidad den suministro di combustibel y evita cu e ciudadano termina pagando mas pa gasolin y diesel. Minister di Finansa, Asuntonan Economico y Sector Primario, Geoffrey Wever, hunto cu director Robert Henriquez, a formalisa un acuerdo di prestamo cu Fuels Marketing & Supply Aruba N.V. (FMSA). E fondo lo wordo usa pa elimina e towernan industrial TOSI y MHI riba e tereno di Refineria di Aruba N.V. (RDA), infrastructura cu, segun evaluacionnan tecnico, ta representa un riesgo pa e operacionnan di e refineria. E decision pa financia e proyecto a wordo aproba door di Conseho di Minister y posteriormente autorisa door di Parlamento di Aruba.

RIESGO PA SUMINISTRO DI ENERGIA

Segun Gobierno, e estado actual di e towernan por crea un situacion peligroso si no tuma accion na tempo. Un colapso di e structuranan por afecta e facilidadnan seriamente cu ta garantisa e suministro di combustibel pa Aruba, cu posteriormente lo por impacta produccion di electricidad y funcionamiento normal di e economia. Minister Wever a bisa cu Gobierno no por spera te ora un problema bira un crisis nacional.  "Nos no por permiti cu Aruba ta confronta un situacion unda un riesgo industrial por afecta nos suministro di combustibel y, como consecuencia, nos produccion di energia. Seguridad energetico ta un fundeshi pa nos economia y pa calidad di bida di nos pueblo," Minister Wever a comenta.

PROTECCION PA E CONSUMIDOR

Gobierno a indica cu Refineria di Aruba no dispone di suficiente recurso financiero pa cubri e inversion urgente aki cu su propio medio. Segun Minister Wever, sin intervencion di Gobierno, RDA lo tabatin cu recupera e costo di e proyecto door di aumenta su margen di distribucion. Consecuentemente, prijs di gasolin y diesel lo subi, cu despues lo repercuti riba costo di transporte, distribucion y prijs di diferente producto y servicio. Door di asumi e financiamiento, Gobierno ta busca pa evita cu e inversion wordo pasa directamente pa e consumidor. "Cada decision financiero cu Gobierno ta tuma mester finalmente traduci den beneficio pa pueblo. Cu e acuerdo aki nos no solamente ta elimina un riesgo pa nos infrastructura energetico, pero nos ta evita cu e ciudadano ta termina pagando e costo via prijsnan mas halto. Asina nos ta proteha e poder di compra di cada famia Arubiano."

PRESTAMO CU CONDICIONNAN ESTRICTO

Minister Wever a splica cu e acuerdo financiero ta inclui diferente condicionnan tecnico, financiero y legal cu mester wordo cumpli prome cu e recurso wordo desembolsa. Ademas, Gobierno a retene e opcion pa converti e prestamo, total of parcialmente, den un inversion di capital den Refineria di Aruba si e interes publico asina exigi. Segun Gobierno, esaki ta ofrece un instrumento adicional pa proteha patrimonio publico y mantene supervision strategico riba e inversion.

INVERSION PA FUTURO DI ARUBA

Minister Wever a conclui cu e proyecto ta refleha e tipo di gobernacion cu Gobierno kier sigui implementa: anticipando riesgo, protehando recurso publico y tuma decisionnan cu ta beneficia tanto e situacion actual como e futuro economico di Aruba. "Bon gobernacion ta anticipa riesgo, proteha e interes general y tuma decisionnan cu ta beneficia Aruba, no solamente awe, pero tambe pa e siguiente generacionnan. Esaki ta un inversion den seguridad, stabilidad economico y confiansa den futuro di nos pais," minister Wever a termina bisando.