Residentenan di Seroe Colorado ta pidi accion: “Nos comunidad no por sigui wordo lubida”

ORANJESTAD – Un grupo di residente di Seroe Colorado, representa door di un miembro di directiva di e Association of Inhabitants of Seroe Colorado, a comparti cu Noticiacla nan creciente preocupacion tocante e estado di nan comunidad. Segun e grupo, despues di numeroso reunion cu representante di polis y diferente comunicacion cu ministernan, hopi di e problema cu nan a pone riba mesa ainda no a haya solucion.

CAS BANDONA 

Segun e residentenan, uno di e problema mas grandi ta e cantidad di cas bandona y terenonan bashi den e parti di colony di Seroe Colorado. Nan ta bisa cu durante mas di 30 aña, hopi di e propiedadnan no a paga erfpacht ni belasting di tereno, loke, segun nan calculacion, por representa mas cu Afl. 3 miyon cu Gobierno no a recauda. Esaki ta pasa precisamente den un momento cu Aruba ta confronta un escasez grandi di vivienda pa habitantenan local. E grupo ta puntra pakico e casnan abandona no ta wordo recupera pa despues wordo pone disponibel pa e hopi famianan cu ta riba lista di espera pa un cas. Nan ta propone cu, si un propietario no a paga erfpacht y belasting durante tres aña of mas, Gobierno mester considera recupera e derechonan riba e propiedad y pone esaki disponibel pa Arubianonan, sea via DIP of door di benta. 

FONDO BA MEHORACION DI CAMINDA Y INFRASTRUCTURA

Segun nan, un parti di e entrada di e bentanan por wordo inverti den mehoracion di camindanan y infrastructura den Seroe Colorado, incluyendo un conexion nobo via e tereno bieu.  E residentenan tambe ta expresa preocupacion cu hopi di e casnan cu ta wordo bende den e area ta termina den man di stranhero cu no ta biba na Aruba. Segun nan, algun di e propietario nobo a converti e casnan den alohamiento pa turista via Airbnb. Nan ta cuestiona con ta posibel cu e transferencia di e propiedadnan ta sigui wordo procesa mientras, segun nan, tin caso di persona cu tin mas cu dos tereno na erfpacht sin ta residente di Aruba.

CALIDAD DI BIDA NA SEROE COLORADO

Ademas di e preocupacionnan riba vivienda, e grupo ta bisa cu calidad di bida den Seroe Colorado a deteriora considerablemente. Nan ta menciona zonido constante di bingo, musica y otro actividadnan, holo  desagradabel cu ta bin di cocina di e hotel den cercania (Secrets: red)  y problema regular cu presion di awa. Nan ta indica cu e aumento di trafico causa door di personal di hotel, construccion, taxi y bus turistico ta crea situacionnan peligroso, specialmente pasobra hopi vehiculo ta core cu velocidad y no tin suficiente sidewalk sigur pa peatonan.

BABY BEACH Y SANTANA DI CACHO

Segun e residentenan, e desaroyo turistico den e area no semper a tuma cuenta cu e comunidad cu tabata biba eynan prome. Nan ta opina cu e hotel nobo por a wordo construi mas leu di casnan existente, mirando cu tin bastante lugar den e area. Tambe nan ta lamenta cu Baby Beach ta bira cada biaha mas yen di bishitante, mientras e area conoci como Santana di Cacho, unda regularmente ta laga animalnan morto, ta sigui bira un problema ambiental serio sin solucion. Nan a propone anteriormente pa crea un memorial unico pa e animalnan morto y instala cameranan di seguridad pa preveni mas abuso, pero segun nan nunca a bin accion concreto.

SEGURIDAD 

Seguridad ta otro punto cu e residentenan ta considera preocupante. Nan ta recorda cu Seroe Colorado ainda tin solamente un caminda principal pa drenta y sali, mientras e caminda di emergencia via e tereno bieu di Lago nunca a wordo realiza. Tambe, e promesa pa establece un post permanente di polis den e area no a wordo cumpli. Un otro propuesta pa converti un di e antiguo casnan di directiva di Lago den un centro pa Guardia Costa, polis y entrenamiento militar tampoco a haya seguimiento.

TARIFA HALTO DI RESTAURANT

Finalmente, e grupo ta cuestiona e tarifa cu, segun nan, Big Mama Restaurant ta cobra pa beach bed y parasol na Baby Beach. Nan kier sa si e actividadnan aki ta wordo ehecuta cu e permiso necesario y si e obligacionnan fiscal correspondiente ta wordo cumpli. Door di e yamada na Noticiacla, e residentenan ta spera cu autoridadnan competente tende nan preocupacionnan y cu finalmente bin un dialogo serio tocante e futuro di Seroe Colorado. Segun nan, e comunidad ta merece e mes atencion y inversion cu otro bario di Aruba, pa asina logra un balansa entre desarrollo turistico y calidad di bida pa su habitantenan.