Dowers: Multa di Afl. 500 pa cada e-step y e-scooter riba caminda publico

ORANJESTAD – Minister di Husticia, Arthur Dowers, a confirma diamars mainta pa Noticiacla, cu Gobierno a drenta den un siguiente fase den su lucha contra e colocacion ilegal di e-steps y otro vehiculonan electrico riba caminda publico. Segun e minister, despues di varios aviso y diferente carta oficial, e personanan y empresanan cu no ta cumpli cu e ordennan di retira e steps, awor lo enfrenta multa di Afl. 500 pa cada violacion. Pues pa cada e-step y of e-scooter staciona riba caminda publico y of den uso riba caminda publico, e compania(nan) responsabel, lo mester paga e suma di 500 florin. 

SUFICIENTE OPORTUNIDAD DUNA 

Durante e entrevista, Dowers a splica cu Gobierno a sigui un proceso cuidadoso y duna e involucradonan suficiente oportunidad pa pone nan asunto na ordo conforme regla. El a bisa cu ta compronde cu den caso di un construccion grandi of un inversion importante, ta husto pa duna un periodo razonabel pa haci e adaptacionnan necesario. Sinembargo, e minister a recorda cu Corte anteriormente a duna un sentencia riba e caso y, como consecuencia di esey, Gobierno tabatin obligacion di sigui cu e procedimiento legal.

A MANDA VARIOS CARTA CABA

“Nos a manda un prome carta pidiendo pa retira e steps. Ora abogado a interveni, nos a manda un otro carta. Despues, e di dos carta a sigui, informando cu e actividad tabata ilegal y cu mester stop di pone e aparatonan aki riba caminda publico. Nan a scoge pa no cumpli,” Dowers a sigui splica.

ULTIMO OPORTUNIDAD

Actualmente, Gobierno a entrega un ultimo notificacion oficial. E documento ta informa e involucradonan cu nan tin 15 dia pa retira tur e steps y stop cu e actividad ilegal. Si despues di e plazo ey e situacion no cambia, Gobierno lo cuminsa imponi multa di Afl. 500 pa cada violacion constata.

BEK PA CORTE

Segun Dowers, ta casi sigur cu e caso lo bolbe den corte. “Awor e decision final ta den man di hues. E lo determina si e situacion actual por sigui, of si lei y orden lo prevalece den nos pais,” el a bisa.

CAMPAÑA Y MAS CONTROL

Paralelo cu e accionnan legal, Gobierno a intensifica su campaña di informacion pa conscientisa tanto residente como turista tocante e uso di e-steps. E meta ta pa haci tur hende sa cu e uso di e aparatonan riba caminda publico por resulta den accion door di polis. Minister Dowers a indica cu Gobierno tambe ta trahando riba un adaptacion chikito den legislacion di trafico, pa facilita ehecucion di e regla y verbalisa e uso ilegal di e steps.

STRATEGIA NOBO DI OPERADORNAN

Segun e minister, despues cu autoridadnan a cuminsa tuma accion, algun operador a cambia di strategia. “Prome nan tabata pone e e-steps riba caminda, obstruiendo e paso. Awor hopi ta coloca e e-steps riba tereno priva, incluso riba propiedad di hotelnan. Hasta e hotelnan mes a presenta keho tocante esey,” a revela Dowers. Aunke e manera di opera a cambia, e minister enfatisa cu esey no kier bisa cu e practica awor ta legal.

MULTA PA CADA STEP

Dowers a aclara cu e multa di Afl. 500 no ta wordo imponi un biaha solamente, sino pa cada violacion cu autoridadnan constata. “Cada e-step cu ta coloca ilegalmente por resulta den un multa di Afl. 500. Si tin diferente steps, cada un ta un violacion separa cu por wordo sanciona,” a conclui e minister. Gobierno ta spera cu e accionnan nobo lo contribui na reestablece ley y orden y mantene e espacionan publico liber y sigur pa tur usuario.