Prome mision humanitario di Aruba a sali rumbo na Venezuela

ORANJESTAD – Aruba ta pone solidaridat den accion. Gobierno di Aruba a confirma cu su prome mision oficial di asistencia humanitario ta sali awe rumbo na Venezuela pa brinda apoyo na e comunidadnan cu a wordo gravemente afecta door di e temblornan devastador.

E salida di e prome ekipo ta sigui varios dianan di preparacion intensivo, durante cual Gobierno a coordina tur aspecto logistico, administrativo y internacional necesario pa haci e operacion posibel.

E mision a wordo prepara den estrecho colaboracion cu Crisis Management Office (CMO), Cruz Cora Aruba y diferente partner nacional y internacional. Segun Gobierno, e coordinacion tabata enfoca riba transporte, seguridad, logistica y e entrega di asistencia den e area cu mas mester sosten.

Cu e preparacionnan awor completa, e prome grupo di personal humanitario ta cla pa cuminza nan mision na Venezuela.

Gobierno di Aruba a indica anteriormente cu e lo pone tur esfuerso pa brinda asistencia rapido y efectivo na e pais vecino despues di e desastre natural. E salida di e prome mision ta representa e prome paso concreto den e compromiso ey.

Autoridadnan no ta exclui cu, dependiendo di e necesidadnan riba tereno y e evolucion di e situacion, misionnan adicional por sigui den e dianan y simannan cu ta bin.

Cu e accion di awe, Aruba ta uni su mes cu e esfuersonan internacional pa brinda alivio y esperanza na e miles di personanan cu a wordo afecta door di un di e desastrenan natural mas grave den region den reciente aña.