Dos fanatico mericano di Mundial ta ricibi invitacion VIP inespera di Prome Minister di Corsou

MYRTLE BEACH/KANSAS CITY – Loke a cuminsa como un biahe frustrante pa mira un partido di Mundial entre Corsou y Alemania, a termina den un experencia unico cu dos fanatico di futbol di Myrtle Beach, Zuid Carolina. Christian y Matty Ott a pasa di perde ticketnan pa ricibi un invitacion VIP cu tur gasto paga directamente di Prome Minister di Corsou.

CON TUR COS A CUMINSA

E dos fanaticonan a bula pa Houston pa presencia e partido entre Alemania y Corsou durante Mundial FIFA 2026. Nan a cumpra ticketnan online via SeatGeek y tur cos tabata parce cla pa e gran dia. Sinembargo, apenas un ora prome cu e partido a cuminsa, nan a ricibi un email, informando cu nan ticketnan tabata cancela. “Nos a kere cu tur cos tabata bon. Direpente nos a ricibi un mensahe cu e ticketnan tabata cancela,” Matty Ott a conta. Aunke e placa a wordo devolvi, e dos hombernan ya tabata na e stadion y desesperadamente buscando un forma pa drenta. Finalmente nan a logra cumpra ticketnan nobo via StubHub pa aproximadamente 700 dollar cada uno, permitiendo nan mira e partido.

UN ENCUENTRO INESPERA NA AEROPUERTO

Despues di disfruta e partido, e aventura no a termina. E siguiente dia, durante un retraso di vuelo na aeropuerto, Christian y Matty a drenta den conversacion cu un señor y su esposa den un bar. Nan a comparti nan experiencia y e problema cu e ticketnan. Pero nan no a realiza cu e homber cu nan tabata papia cune tabata nada menos cu Prome Minister di Corsou, Gilmar ‘Pik’ Pisas. Segun e dos fanatico, durante e conversacion e mandatario a sorprende nan cu un invitacion extraordinario. “Mi ta Prome Minister di Corsou. Scohe un partido, e di Ecuador of e di Costa di Marfil, y nos lo hiba boso aya,” e mandatario a bisa nan.

VIAHE VIP PA KANSAS CITY

Despues di ricibi e invitacion, Matty a yama su mama pa conta e noticia. Su reaccion tabata simple: “Claro cu bo ta bay.” Poco tempo despues, e dos fanaticonan a wordo bula pa Kansas City pa presencia e encuentro entre Corsou y Ecuador. Durante e biahe nan a pasa tempo cu famia y amistadnan di e Prome Minister y a ricibi un trato VIP completo. Nan a asisti na un reunion priva den hotel InterContinental Plaza, unda nan a conoce empresario, CEO y otro invitadonan distinguido. Tambe nan a mira e partido entre Hulanda y Tunez den un ambiente exclusivo.

ASIENTONAN SPECTACULAR Y UN ATMOSFERA INOLVIDABEL

Ora tempo a yega pa e partido di Corsou, Christian y Matty a disfruta di un ambiente spectacular. Nan a relata cu e fanaticonan di Corsou a crea un atmosfera unico cu baile, cantica y celebracion. “E asientonan tabata increibel. E bista tabata spectacular. Nos a siña varios cantica di e fanaticonan y nos a pasa un tempo fantastico,” nan a conta.

Despues di un dia yen di actividadnan, e dos amigonan a bolbe nan hotel cansa pero agradeci pa un experencia cu probablemente nan lo no lubida nunca.

Loke a cuminsa como un biahe yen di frustracion, gasto extra y ticketnan cancela, finalmente a cambia den un aventura extraordinario y un historia cu lo keda cu nan pa bida. Y tur, danki na e gesto di prome minister di Corsou, cu a regla pa e dos hombernan haya un experiencia differente.