Shete pais a clasifica caba pa e ronda eliminatorio di mundial 2026

MIAMI  – Mientras e emocion di Mundial FIFA 2026 ta sigui crece den Merca, Canada y Mexico, varios di e gran favorito nan a cumpli cu e expectativa y a sigura nan clasificacion pa e fase eliminatorio. Te cu awor, shete seleccion nacional a logra clasifica oficialmente pa e Ronda di 32 despues di nan prome dos partido di grupo. Tin tambe algun sorpresa interesante, pero e gran potencia nan a demostra cu nan ta candidato serio pa sigui avansa.

MEXICO TABATA E PROME CLASIFICA

Como uno di e tres pais anfitrion, Mexico a bira e prome seleccion pa asegura su puesto den e siguiente ronda. E ekipo dirigi pa Javier Aguirre a cuminza e torneo cu un victoria di 2-0 riba Sur Africa, siguí pa un triunfo di 1-0 contra Corea di Sur. Cu seis punto for di dos partido, Mexico a sigura clasificacion temprano.

MERCA TA IMPONE NA CAS

E seleccion di Merca a cuminza su campaña di forma impresionante cu un victoria di 4-1 riba Paraguay. Despues, e mericanonan a agrega un triunfo di 2-0 contra Australia, resultado cu a confirma nan clasificacion pa e Ronda di 32.

ALEMANIA LAGA E DECEPCIONNAN ATRAS

Despues di dos eliminacion doloroso den fase di grupo na Mundial 2018 y 2022, Alemania finalmente a laga e pasado atras. E alemannan a vence Corsou cu un contundente 7-1 y despues a derota Costa di Marfil pa sigura nan lugar den e siguiente ronda.

MESSI TA SIGUI HACI HISTORIA

Na 39 aña di edad, Lionel Messi ta sigui demuestra cu e ta uno di e mihor hungadornan di tur tempo. Danki na cinco gol di e estreya di Argentina, e vigente campeon mundial a vence Argelia y Austria cu autoridad pa clasifica sin problema pa e siguiente fase.

FRANCIA TA CONFIRMA SU FAVORITISMO

Cu un di e ofensivanan mas fuerte di e torneo, Francia ta considera como uno di e gran candidato pa hiba e copa pa cas. Lidera pa Kylian Mbappe, e francesnan a gana nan prome dos partido y a asegura un puesto den e fase eliminatorio.

NORUEGA TA BOLBE CU AUTORIDAD

Despues di 28 aña sin participa den un Mundial, Noruega a regresa di forma impresionante. E noruegonan a derrota Irak 4-1 y despues a vence Senegal 3-2 den un partido emocionante pa clasifica pa e siguiente ronda.

COLOMBIA TA E CLASIFICA MAS RECIENTE

Colombia a bira e septimo pais pa sigura su boleto pa e Ronda di 32. E suramericanonan a cuminza cu un victoria di 3-1 riba Uzbekistan y despues a supera Republica Democratica di Congo 1-0 pa alcanza seis punto y confirma su clasificacion.

MAS PAIS POR SIGUI PRONTO

Cu hopi grupo ainda no a termina su calendario, ta spera cu varios otro favorito nan lo uni na e lista den e siguiente dianan. Entre e seleccionnan cu ainda ta bringa pa clasifica tin Hulanda, Hapon, Brasil, Inglatera, Spaña y Portugal, mientras cu Corsou ainda tin oportunidad di haci historia den su debut mundialista.

E prome ronda di Mundial 2026 ta drenta den su fase decisivo, y cada punto awor por marca e diferencia entre sigui soña cu gloria of bay cas.