Fiesta pa mira WK na Bogota: Corsou ta focus riba e turista Colombiano

WILLEMSTAD – Curaçao Tourist Board lo organiza diaranson 25 di juni un evento  special na Bogotá rond di e partido di Mundial entre Corsou y Costa di Marfil. E actividad lo tuma lugar na e Curaçao Experience Center y ta enfoca riba consumidor Colombiano, medio di comunicacion y partnernan den sector turistico. Segun e oficina di turismo, Corsou ta uza su participacion den Campeonato Mundial di Futbol pa aumenta visibilidad di e isla den mercadonan importante di Latinoamerica. Durante e actividad, ademas di mira e partido, tambe lo tin atencion pa cultura Corsou y promocion turistico di e isla.

EVENTO SIMILAR A WORDO ORGANIZA ANTERIORMENTE NA SURAMERICA

Anteriormente, e organizacion di turismo di Corsou a organiza diferente fiesta pa mira partidonan di e seleccion nacional bou di e concepto “Blue Wave” na Brasil y Argentina. Na São Paulo, aproximadamente 85 invitado a participa den e actividad, mientras cu na Buenos Aires tabatin 70 asistente. Entre e invitadonan tabatin representante di industria di biahe, medio di comunicacion, influencer y creadornan di contenido digital. Segun Curaçao Tourist Board, e actividadnan aki a genera atencion mediatico den Brasil y Argentina, incluyendo cobertura den medio conoci manera Folha de S.Paulo, ESPN, Panrotas, Ladevi y BoardingPax.

EXPERIENCE CENTER TA HUNGA UN ROL IMPORTANTE DEN PROMOCION

Curaçao Experience Center na Bogotá ta organiza durante henter aña diferente actividad relaciona cu dianan festivo, tradicionnan y momentonan cultural di Corsou. Segun e oficina di turismo, durante Mundial e centro ta sirbi como un punto di encuentro unda  e bishitante potencial por conoce mas di e isla, su cultura y e diferente posibilidadnan turistico cu Corsou tin pa ofrece. Cu e iniciativa aki, Corsou ta busca pa converti e entusiasmo rond di Mundial den mas interes pa vacacion y mas yegada di turista for di Colombia y otro paisnan di Latinoamerica.